پاۆلودار وبلىسىنىڭ ماي اۋدانىندا مەسليحات دەپۋتاتتىعىنا كانديدات رەتٸندە قۇجات تاپسىرۋعا بارعان باعلان زييابەكوۆ پوليتسييا بٶلٸمٸنە كٷشتەپ جەتكٸزٸلگەنٸن مەلٸمدەدٸ. وقيعا تۋرالى ۆيدەونى قوعام بەلسەندٸسٸ وڭعار قابدەن ەلەۋمەتتٸك جەلٸدە جارييالادى, دەپ حابارلايدى dalanews.kz.
باعلان زييابەكوۆتٸڭ ايتۋىنشا, وقيعا 2026 جىلعى 27 قازاندا №6 وكرۋگتٸك سايلاۋ كوميسسيياسىنىڭ عيماراتىندا بولعان. بۇل كٷنٸ كانديداتتاردان قۇجات قابىلداۋ مەرزٸمٸ اياقتالۋعا تيٸس بولعان.
"دەپۋتاتتىققا سايلاۋعا قاتىسۋ ٷشٸن قۇجات تاپسىراتىن كەزدە ۇلتتىق قاۋٸپسٸزدٸك كوميتەتٸنٸڭ قىزمەتكەرٸ باستاعان پوليتسييا قىزمەتكەرلەرٸ قولىمدى قايىرىپ, سايلاۋ كوميسسيياسىنىڭ عيماراتىنان پوليتسييا بٶلٸمٸنە الىپ كەتتٸ", – دەدٸ ول ۆيدەودا.
باعلان زييابەكوۆ ٶزٸنٸڭ 2023 جىلى ماي اۋداندىق مەسليحاتىنىڭ دەپۋتاتتىعىنا سايلانعانىن ايتتى. ونىڭ سٶزٸنشە, سول كەزدەگٸ سايلاۋدا AMANAT پارتيياسى اۋداندىق فيليالىنىڭ باسشىسىمەن بەسەكەگە تٷسٸپ, سايلاۋشىلاردىڭ باسىم داۋىسىن جيناعان.
"2023 جىلى پاۆلودار وبلىسى ماي اۋداندىق مەسليحاتىنىڭ دەپۋتاتتىعىنا AMANAT پارتيياسىنىڭ باسشىسىمەن بٸرگە سايلاۋعا تٷستٸم. تۇرعىنداردىڭ قولداۋىمەن ايقىن باسىمدىقپەن جەڭٸپ, دەپۋتات اتاندىم. دەپۋتات بولعان كەزٸمدە جەمقورلىققا قاتىستى مەسەلەلەردٸ اشىق كٶتەرٸپ, ەدٸل سايلاۋ تۋرالى بٸرنەشە رەت ايتتىم", – دەدٸ زييابەكوۆ.
ونىڭ مەلٸمدەۋٸنشە, دەپۋتاتتىق ٶكٸلەتتٸگٸ توقتاعاننان كەيٸن قايتادان سايلاۋعا قاتىسۋ ٷشٸن 27 قازاندا №6 وكرۋگتٸك سايلاۋ كوميسسيياسىنا قۇجات تاپسىرۋعا بارعان. الايدا كوميسسييا ورنالاسقان عيماراتقا جەتپەي جاتىپ, بەلگٸسٸز ادامدار ونىڭ جولىن بٶگەمەك بولعان.
"بارا جاتقان جولىمدا بەيتانىس ادامدار مەنٸ توقتاتۋعا ەرەكەت جاسادى. كەدەرگٸلەرگە قاراماستان, №6 وكرۋگتٸك سايلاۋ كوميسسيياسىنىڭ عيماراتىنا كٸردٸم. ٶتٸنٸش بلانكٸسٸن سۇراعانىمدا, قىزمەتكەرلەر كومپيۋتەر جۇمىس ٸستەمەي تۇرعانىن ايتىپ, بەرە المادى", – دەيدٸ ول.
بۇدان كەيٸن عيماراتقا پوليتسييا قىزمەتكەرلەرٸ كەلگەن. زييابەكوۆتٸڭ سٶزٸنشە, تەرتٸپ ساقشىلارى ونى سول جەردەن الىپ كەتۋگە ەرەكەت جاساعان. ال سايلاۋ كوميسسيياسىنىڭ ٶكٸلدەرٸ نوۋتبۋكتٸڭ قۇپيياسٶزٸن ۇمىتىپ قالعانىن جەنە ٶتٸنٸشتٸ باسىپ شىعارا الماي وتىرعانىن ايتىپ, كٷتە تۇرۋىن سۇراعان.
"اۋداندىق سايلاۋ كوميسسيياسىنىڭ باسشىسى مارينا ۆالەرەۆناعا شاعىمدانىپ, ماعان نەگە ٶتٸنٸش بەرٸلمەي جاتقانىن تٷسٸندٸرۋدٸ سۇرادىم. ٶزٸمنٸڭ ازاماتتىق قۇقىعىمدى تالاپ ەتتٸم. كەيٸن عيماراتتا دابىل قاعىلىپ, ٶرت سٶندٸرۋ كٶلٸكتەرٸ كەلدٸ. بٸزدٸ سىرتقا شىعۋعا مەجبٷرلەدٸ", – دەدٸ باعلان زييابەكوۆ.
ونىڭ ايتۋىنشا, عيماراتتان شىققاننان كەيٸن ٶزٸن ۇلتتىق قاۋٸپسٸزدٸك كوميتەتٸنٸڭ قىزمەتكەرٸ رەتٸندە تانىستىرعان ەرسٸنبەك ەسٸمدٸ ادام پوليتسييا ٶكٸلدەرٸمەن سٶيلەسكەن. وسىدان سوڭ تەرتٸپ ساقشىلارى ونىڭ قولىن قايىرىپ, پوليتسييا بٶلٸمٸنە الىپ كەتكەن.
قوعام بەلسەندٸسٸ وڭعار قابدەننٸڭ جازۋىنشا, باعلان زييابەكوۆ پوليتسييا بٶلٸمٸنەن سول كٷنٸ ساعات 18:00-دە بوساتىلعان. ال اۋماقتىق سايلاۋ كوميسسيياسىنىڭ تٶراعاسى زييابەكوۆ ساعات 18:05-تە كەلگەنٸن العا تارتىپ, ونىڭ ٶتٸنٸشٸن قابىلداۋدان باس تارتقان. قۇجات قابىلداۋدىڭ سوڭعى كٷنٸ 27 قازان بولعان.
وڭعار قابدەن باعلان زييابەكوۆتٸڭ 2018 جىلى ارنايى باعدارلاما بويىنشا جەتٸسايدان پاۆلودار وبلىسىنىڭ ماي اۋدانىنا كٶشٸپ كەلگەنٸن جازدى. بەلسەندٸنٸڭ مەلٸمەتٸنشە, زييابەكوۆ دەپۋتات بولعان كەزٸندە قۇنى 610 ميلليون تەڭگە بولاتىن اۋرۋحانانىڭ درەناج جٷيەسٸنە جەنە 200 ميلليون تەڭگەدەن استام قارجى جۇمسالعان پونتون كٶپٸرٸنٸڭ قۇرىلىسىنا قاتىستى مەسەلەلەردٸ كٶتەرگەن.
ەزٸرگە پاۆلودار وبلىسىنىڭ پوليتسييا دەپارتامەنتٸ, ۇلتتىق قاۋٸپسٸزدٸك كوميتەتٸنٸڭ اۋماقتىق ورگانى جەنە وبلىستىق سايلاۋ كوميسسيياسى باعلان زييابەكوۆ پەن وڭعار قابدەننٸڭ مەلٸمدەمەسٸنە رەسمي تٷسٸنٸكتەمە بەرگەن جوق.
