Qazaqstanda jylyna 142 myń tonna sút óndiretin 28 taýarlyq sút fermasy salynyp jatyr. Bul týraly Úkimet otyrysynda Aýyl sharýashylyǵy ministri Aidarbek Saparov málimdedi, dep habarlaidy dalanews.kz.
Ministrdiń aitýynsha, Memleket basshysynyń tapsyrmasyna sáikes Soltústik Qazaqstan oblysynda sátti júzege asqan tájiribeni ózge óńirlerge taratý jumystary jalǵasyp keledi. Osy bastama aiasynda elimizde zamanaýi sút fermalarynyń jelisi keńeitilmek.
"Biylǵy jyldyń sońyna deiin iske qosylǵan fermalardy jobalyq qýatynyń 70 paiyzyna jetkizý kózdelip otyr. Al kelesi jyly olar tolyq qýatynda jumys isteýge tiis. Jalpy jylyna 462 myń tonna sút óndiretin 71 ferma týraly sóz bolyp otyr", – dedi Aidarbek Saparov.
Aýyl sharýashylyǵy ministrliginiń málimetinshe, qazir jylyna 600 myń tonnadan astam sút óndirýge múmkindik beretin 99 joba qarjylandyrylǵan. Sonyń ishinde jalpy qýaty 142 myń tonnaǵa jetetin 28 taýarlyq sút fermasynyń qurylysy júrip jatyr.
Sonymen qatar kelesi jyly iske asyrylatyn jobalar da ázirlengen. Jospar boiynsha jyldyq óndiris kólemi 228 myń tonnany quraityn taǵy 21 taýarlyq sút fermasy salynbaq.
