Qazaqstanda aýyl sharýashylyǵyn jeńildetilgen qarjylandyrý kólemin ulǵaitý, mal sharýashylyǵyn qoldaý jáne otandyq aýyl sharýashylyǵy tehnikasynyń óndirisin damytý josparlanyp otyr, dep habarlaidy dalanews.kz.
Úkimettiń baspasóz qyzmetiniń málimetinshe, bul týraly Úkimet otyrysynda aýyl sharýashylyǵy ministri Aidarbek Saparov málimdedi.
2026 jyly «Báiterek» holdingi arqyly aýyl sharýashylyǵy óndirýshilerine uzaqmerzimdi qaryz berýge 270 mlrd teńge qarastyrylǵan. Sonymen qatar mal sharýashylyǵyn qoldaýǵa 84 mlrd teńge, al otandyq aýyl sharýashylyǵy tehnikasynyń óndirisin damytý úshin «QazAgroQarjy» arqyly 50 mlrd teńge biýdjettik nesie bólý usynylyp otyr.
Ministrdiń aitýynsha, sharýalardy uzaqmerzimdi jeńildetilgen qarjylandyrý úshin biýdjet qarajaty men kommertsiialyq resýrstardy biriktirý tetigi qarastyrylǵan. Bul qolma-qol aqshany baqylaý shotyndaǵy qarajat jetkiliksiz bolǵan jaǵdaida da qarjylandyrýdy ýaqtyly qamtamasyz etýge múmkindik beredi.
Osy maqsatta «Báiterek» holdingi kýpondyq syiaqyny sýbsidiialaý tetigi arqyly biýdjetten tys qarajat tartýdy jalǵastyryp, ony agroónerkásip keshenin nesielendirýge baǵyttaýy qajet.
Budan bólek, «QazAgroQarjyǵa» qosymsha 37,5 mlrd teńge bólý usynyldy. Bul qarajat 2027 jyly aýyl sharýashylyǵy tehnikasynyń jeńildetilgen lizingine 200 mlrd teńge tartýǵa múmkindik beredi.
Sondai-aq Soltústik Qazaqstan oblysynyń tájiribesin keńinen taratý baǵdarlamasy aiasynda aýyl sharýashylyǵy janýarlaryn satyp alýǵa jeńildetilgen nesie berý úshin qosymsha 50 mlrd teńge bólý usynylyp otyr.
