Britandyq akter ári komik Sasha Baron Koen Qazaqstan halqynan keshirim surap, ózi somdaǵan Borat beinesiniń shynaiy Qazaqstanǵa esh qatysy joq ekenin aitty. Happy Sad Confused podkastyna bergen suhbatynda ol Qazaqstan elshiliginiń kezinde filmge qatysty shaǵymdanýy oryndy bolǵanyn moiyndady, dep habarlaidy dalanews.kz.
Koenniń aitýynsha, Borattyń shyqqan eli bastapqyda Moldova men Albaniia bolǵan. Keiin ol Qazaqstandy tańdaǵan, óitkeni suhbattasatyn adamdardyń bul el týraly az biletinin jáne oidan shyǵarylǵan oqiǵalarǵa senýi múmkin ekenin boljaǵan.
«Qazaqstan elshiliginen shaǵym tústi. Shynyn aitqanda, ol ábden oryndy edi», – dedi akter.
Sondai-aq ol qazaqstandyqtardan keiipkeriniń sóileý mánerine eliktegeni úshin keshirim surady. Koenniń sózinshe, Borattyń áreketi Qazaqstandy emes, ózi sóilesken adamdardyń nadandyǵyn áshkereleýge baǵyttalǵan.
2006 jyly shyqqan «Borat» komediiasynda Qazaqstan ádeii burmalanyp kórsetilip, basty keiipker násilshildik, antisemittik jáne seksistik kózqarastardy ashyq bildiredi. Bul film qazaqstandyqtardyń narazylyǵyn týdyrdy. 2020 jyly onyń jalǵasy jaryq kórdi.
Borat beinesine qatysty daý kinoteatrmen ǵana shektelmedi. 2012 jyly Kýveittegi nysana kózdeý jarysynda qazaqstandyq sportshy Mariia Dmitrienkony marapattaý kezinde el ánuranynyń ornyna filmdegi parodiialyq án qoiyldy. Uiymdastyrýshylar keiin keshirim surap, rásimdi qaita ótkizdi.
Keiin Qazaqstan bul keiipkerdiń tanymaldyǵyn týrizmdi nasihattaýǵa paidalanýǵa tyrysty. 2020 jyly Kazakh Tourism «Very nice!» («Óte keremet!») tirkesin jarnama naýqanyna qosyp, eldiń tabiǵaty men kórikti jerlerin tanystyrdy.
