S. Asfendiiarov atyndaǵy Qazaq ulttyq meditsina ýniversiteti Almatydaǵy "Aqsai" balalar klinikasyn qaita jańǵyrtý úshin memlekettik satyp alý konkýrsyn jariialady. Jobaǵa QQS-syz 11,1 mlrd teńge qarastyrylǵan, dep habarlaidy dalanews.kz.
Satyp alý qujatynda klinikanyń ataýy tikelei jazylmaǵan. Alaida qurylys júrgiziletin mekenjai retinde Taýtaǵan kóshesi, 2 kórsetilgen. Bul jerde «Aqsai» ýniversitettik klinikasy ornalasqan.
"Aqsai" – 300 oryndyq kópsalaly balalar aýrýhanasy. Munda elimizdiń ár óńirinen jaǵdaiy aýyr balalar jetkiziledi. Aimaqtaǵy dárigerler emdei almaǵan naýqastar aýrýhanaǵa sanitarlyq aviatsiiamen ákelinedi. Sol sebepti klinikany aýyr dertke shaldyqqan balalar úshin «sońǵy úmit» dep ataidy.
Joba boiynsha aýrýhananyń «A» blogy qaita jóndelip, oǵan qosymsha ǵimarat salynady. Sondai-aq nysan jer silkinisine tózimdi bolýy úshin kúsheitiledi. Qurylys eki kezeńmen júrgizilip, 27 aiǵa sozylmaq.
Konkýrsty jeńip alǵan merdigerge jalpy somanyń 30 paiyzy aldyn ala tólenedi. Bul shamamen 3,3 mlrd teńge.
Buǵan deiin Densaýlyq saqtaý ministrligi QazUMÝ janynan 300 oryndyq jańa klinika salýdy josparlaǵan edi. Joba memlekettik-jekemenshik áriptestik negizinde júzege asýǵa tiis bolatyn. Alaida bul jospar oryndalmady. Endi qoldanystaǵy "Aqsai" klinikasyn memleket qarjysyna jańǵyrtý kózdelip otyr.
Qazir negizgi másele – qurylys júretin eki jyldan astam ýaqyt ishinde aýrýhanada em qabyldaityn balalardyń qaida jáne qalai emdeletini. Bul suraqqa ázirge naqty jaýap berilgen joq.
