Áleýmettik jelilerde kýrer bolyp qosymsha jumys isteitin analardy áleýmettik tólemderden aiyrý josparlanyp jatqany týraly aqparat shyndyqqa janaspaidy, dep habarlaidy Dala News.
Eńbek jáne halyqty áleýmettik qorǵaý ministrliginiń málimetinshe, bala kútimimen ainalysatyn jumyssyz ata-analarǵa respýblikalyq biýdjet esebinen bala bir jarym jasqa tolǵanǵa deiin memlekettik áleýmettik járdemaqy tólenedi. Bul tólemder eshqandai shartsyz beriledi jáne alýshy keiin jumysqa ornalasqan jaǵdaida da toqtatylmaidy.
Sondai-aq mindetti áleýmettik saqtandyrý júiesine qatysatyn jumys isteitin ata-analarǵa Memlekettik áleýmettik saqtandyrý qorynan bala bir jarym jasqa tolǵanǵa deiin tabysynan aiyrylýyna bailanysty áleýmettik tólem taǵaiyndalady. Onyń mólsheri bala týǵanǵa deiingi sońǵy eki jyldaǵy ortasha ailyq tabystyń 40 paiyzyn quraidy.
Ministrlik Áleýmettik kodeks normalaryna sáikes, mundai tólemderdi toqtatý tek alýshynyń óz erkimen jazǵan ótinishi negizinde ǵana júzege asyrylatynyn atap ótti.
Vedomstvo buqaralyq aqparat quraldary men áleýmettik jeli qoldanýshylaryn resmi málimdemelerdi túsindirýde muqiiat bolýǵa jáne azamattardy jańylystyratyn taqyryptardan aýlaq bolýǵa shaqyrdy.
Ministrlik azamattarǵa tek ýákiletti memlekettik organdardyń resmi túsindirmelerine súienýge keńes berdi.
