Ispaniiadan Almatyǵa Qazaqstan Qarýly kúshteriniń Áýe qorǵanysy kúshterine arnalǵan ekinshi aýyr áskeri-kólik Airbus A400M Atlas ushaǵy jetkizildi, dep habarlaidy dalanews.kz.
Jańa áýe kemesi áskeri-kólik aviatsiiasynyń múmkindikterin keńeitip, qorǵanys jáne gýmanitarlyq mindetterdi oryndaýǵa paidalanylmaq.
Ekinshi A400M ushaǵynyń kelýi Qazaqstannyń áskeri-kólik aviatsiiasyn damytýǵa múmkindik beredi. Bul áýe kemeleri áskeri mindettermen qatar, tótenshe jaǵdailardyń saldaryn joiý, halyqty evakýatsiialaý jáne gýmanitarlyq kómek jetkizý úshin de qoldanyla alady.
Sonymen birge ushaqtar qazaqstandyq áskeri qyzmetshilerdiń halyqaralyq bitimgerlik missiialarǵa qatysýyn qamtamasyz etýge paidalanylmaq. Bul ulttyq bitimgerlik kontingentti shetelge óz kúshimen tasymaldaý múmkindigin keńeitedi.
Jańa aviatsiialyq tehnikany paidalanýǵa qazaqstandyq ekipajdar men injenerlik-tehnikalyq mamandar daiyndalǵan. Olar Ispaniianyń Sevilia qalasyndaǵy Airbus oqý ortalyǵynda teoriialyq jáne praktikalyq daiarlyqtan ótip, áýe kemesin basqarý, paidalaný jáne tehnikalyq qyzmet kórsetý erekshelikterin meńgergen.
Airbus A400M áskeri-kólik ushaǵy Qazaqstandy qosa alǵanda, on eldiń qarýly kúshterinde qoldanylady. Olardyń qatarynda Túrkiia, Germaniia, Malaiziia, Indoneziia, Frantsiia, Ulybritaniia, Ispaniia, Belgiia jáne Liýksembýrg bar.
A400M aýyr áskeri tehnikany alys qashyqtyqqa tasymaldaýǵa arnalǵan. Sonymen qatar ol qysqa ári arnaiy jabyn tóselmegen ushý-qoný jolaqtaryna qonýǵa qabiletti. Bul múmkindik Qazaqstan Qarýly kúshteriniń jedel áreket etý jáne tasymaldaý áleýetin arttyrady.
