Almaty qalasynyń ár aýdanynda Úkimet ókilderi, Quryltai depýtattary men Qazaqstan Halyq keńesi músheleriniń halyqpen kezdesýleri ótti. Onda Memleket basshysy Qasym-Jomart Toqaevtyń «Jańa tarihi kezeńdegi Qazaqstannyń ózekti mindetteri» atty Qazaqstan halqyna Joldaýyndaǵy aýqymdy bastamalardy túsindirildi. Kezdesýlerde infraqurylymdy jańǵyrtý, áleýmettik qoldaýdy kúsheitý jáne halyqtyń turmys sapasyn arttyrýǵa baǵyttalǵan túiindi máseleler jan-jaqty talqylandy. Atap aitqanda, Ulttyq qor qarajatyn tiimdi igerý, eń tómengi jalaqyny kezeń-kezeńimen ósirý jáne óńirdegi áleýmettik nysandardyń qurylysyn jedeldetý máseleleri basty nazarda boldy, dep habarlaidy dalanews.kz.
Turǵyndardyń usynystary eskeriledi
Áleýmettik qyzmetter úiinde Quryltai depýtaty Aidos Sarym, Eńbek jáne halyqty áleýmettik qorǵaý birinshi vitse-ministri Erbol Tuiaqbaev, Qazaqstan Halyq keńesiniń múshesi Aigúl Sádýaqasova, Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov áleýmettik qorǵaý salasynyń ókilderimen kezdesti. Sonymen qatar, atalǵan jumys toby megapolistegi bilim, meditsina salasynyń ókilderimen jáne Bostandyq, Medeý aýdanynyń turǵyndarymen jolyqty. Is-sharalar barysynda Memleket basshysy Joldaýda kótergen ózekti máseleler ortaǵa salynyp, aitylǵan tapsyrmalardyń mindet-maqsaty túsindirildi. Oǵan qosa, ártúrli sala ókilderiniń pikiri tyńdalyp, usynystary eskerildi.
– Bizdiń basty mindetimiz – Prezidenttiń ideialary men tapsyrmalaryn halyqqa jetkizý, sondai-aq atalǵan máseleler boiynsha azamattardyń pikirlerin, usynystary men ustanymdaryn jinaqtaý. Búgingi kezdesý barysynda áleýmettik sala ókilderi memlekettik deńgeide sheshýdi talap etetin naqty túitkilderdi kóterdi. Aitylǵan barlyq usynysty keiinnen júielep, pysyqtaý úshin tirkep jatyrmyz, – dedi Aidos Sarym.
Al Qazaqstan Halyq keńesiniń múshesi Aigúl Sádýaqasova ustazdar qaýymyn tolǵandyrǵan máselelerge toqtaldy. Ol Prezident tujyrymdamalaryn halyqqa jetkizýde pedagogterdiń orny erekshe ekenin atap ótti.
– Pedagogter óz tilekterin, usynymdaryn jáne erekshe bilim berýdi qajet etetin balalardy tárbieleýge qatysty suraqtaryn jetkizdi. Árine, ustazdar qaýymyna úlken jaýapkershilik júkteledi – bul oi-sanamen jumys isteý, Prezidenttiń «Adal azamat», «Taza Qazaqstan» tujyrymdamalary asynda tárbie berý. Bul máselege de basa nazar aýdaryldy. Memleket basshysy Joldaýynda inkliýzivti jańa damý ortalyqtaryn salý jáne iske qosý qajettigin atap ótti, – dedi Aigúl Sádýaqasova.
Qala turǵyndarymen talqylady
Quryltai depýtaty Sergei Ponomarev, Qazaqstan Halyq keńesiniń múshesi Meiirjan Otynshiev, Qarjy vitse-ministri Áset Turysov, Almaty qoǵamdyq keńesiniń múshesi Asqat Qabashev jáne «Atameken» UKP Almaty qalasy boiynsha direktory Shyńǵyshan Mamanov bastaǵan ekinshi jumys toby Almaly, Áýezov jáne Jetisý aýdandarynyń turǵyndarymen júzdesti. Odan bólek, Ǵylym ordasynda ǵylymi qaýymdastyq ókilderimen, Investitsiialar úiinde kásipkerlermen kezdesý ótkizdi.
– Keiingi jyldary elimizde orasan zor ózgerister bolyp jatyr. Qazaqstan damýdyń jańa kezeńine qadam basty. Memleket basshysy Joldaýynda Úkimetke infraqurylymdy jańǵyrtýdyń naqty josparyn ázirleýdi tapsyrdy. Ol úshin Ulttyq qordy maqsatty túrde paidalaný óte mańyzdy. Osy aýqymdy bastamany júzege asyrý úshin Ulttyq qordan 2029 jyldyń sońyna deiin 6,5 trillion teńge bólinedi. Infraqurylymǵa investitsiia quiý – adam kapitalyna, azamattardyń ómir sapasyn arttyrýǵa baǵyttalǵan uzaq merzimdi salym retinde qarastyrylady. Iaǵni memlekettik qarajat ekonomikalyq jáne áleýmettik qaitarymyn berýi tiis. Memleket basshysy atap ótkendei, bolashaq urpaq aldyndaǵy tarihi jaýapkershilik tek olardyń shottaryna aqsha jinap berýmen ǵana shektelmeidi, damyǵan el quryp, ony mura etip qaldyrý da mańyzdy. Sonymen qatar, respýblikada 70 densaýlyq saqtaý obektisi jáne 50-ge jýyq bilim berý, sport jáne mádeniet obektileri salynady, – dedi Quryltai depýtaty Sergei Ponomarev.
Tabysty arttyrý jáne áleýmettik infraqurylymdy damytý
Al Qazaqstan Halyq keńesiniń múshesi Meiirjan Otynshiev áleýmettik jáne densaýlyq saqtaý salalaryna toqtalyp, Prezident tapsyrmasy negizinde atqarylatyn jumystardy túsindirdi. Onyń aitýynsha, Prezident Joldaýyndaǵy basty basymdardyń biri – halyqtyń turmys sapasyn arttyrý. Sondyqtan 2027 jyldyń 1 qańtarynan bastap eń tómengi jalaqyny 85 000 teńgeden 110 000 teńgege deiin kóterý josparlanyp otyr.
- Bul sheshim elimizdegi 1 million 800 myń adamnyń tabysyn arttyrýǵa áser etýi tiis. Áleýmettik saiasattyń taǵy bir mańyzdy baǵyty – densaýlyq saqtaý jáne bilim berý. Prezident Joldaýynda elimiz boiynsha jańa meditsinalyq mekemeler salý jospary jariialandy. Sonyń ishinde Almaty qalasynda jańa kópbeiindi balalar aýrýhanasyn salý kózdelip otyr. Ótken aptada qalada úlken onkologiialyq ortalyqty salý boiynsha jumystar bastalyp ketti. Osy Joldaý aiasyndaǵy birinshi qadam dep qabyldańyzdar. Sonymen qatar, erekshe qajettilikteri bar balalar úshin qoljetimdi ári qaýipsiz ortalyq qalyptastyrý máselesin kóterdi. Árbir bala sapaly bilim alýǵa, densaýlyǵyn saqtaýǵa jáne óz qabiletin damytýǵa teń múmkindik alýǵa tiis, – dedi Meiirjan Otynshiev.
Naqty sektorǵa nazar aýdaryldy
Kelesi jumys tobynyń quramynda Quryltai depýtaty Aijan Skakova, Energetika vitse-ministri Qaiyrhan Tutqyshbaev, Ónerkásip jáne qurylys vitse-ministri Qýandyq Qajkenov jáne Almaty qoǵamdyq keńesiniń tóraǵasy Nurjan Jaqypov boldy. Olar Alataý, Naýryzbai jáne Túrksib aýdandarynyń turǵyndarymen, sondai-aq IT qaýymdastyq ókilderimen, qala jastarymen kezdesti. Onda memlekettik organdar men qoǵamdyq uiymnyń ókilderi turǵyn úi qurylysy men infraqurylymdy damytý, energetika, sý resýrsyn únemdeý men azamattardy qoldaý jaǵyn talqylady.
Energetika vitse-ministri Qaiyrhan Tutqyshbaev eldegi energetikalyq sektordyń búgingi ahýalyna toqtalyp, aldaǵy iri jobalar týraly baiandady.
– Memleket basshysy árdaiym energetika salasyna erekshe nazar aýdarady. Energetika ministrligi jumysynyń negizgi baǵyttarynyń biri bul – elektr energetikasynyń kómir generatsiiasyn damytý. Odan bólek, bizdiń ministrlik gazdandyrý boiynsha quziretti organ bolyp esepteledi. Ótken jyldyń qorytyndysy boiynsha elektr energiiasyn óndirý kólemi eń joǵary deńgeige jetti. Bul 123,1 mlrd. kilovatt saǵatty qurady. Al túptik kólemi 124,6 mlrd. kilovatt saǵatty qurady, iaǵni tapshylyq bar. Sondyqtan energetikalyq qaýipsizdikti arttyrý jáne ekonomikanyń ósip kele jatqan qajettiligin qamtamasyz etý maqsatynda jańa generatsiia qýattary qajet. 2029 jyldy qosa alǵanda, jalpy qýaty 13,3 GVt bolatyn energetikalyq qýattar iske qosylady. Kelesi jyly Almaty JEO-3-te 544 MVt qýatpen qamtamasyz etetin taǵy ortalyq iske qosý josparda bar. Gazdandyrýǵa toqtalsaq, qazir Almaty qalasynda eshqandai úlken máseleler joq, – dedi ol.
Al Aijan Sqaqova azamattardyń kúndelikti ómirine tikelei áser etetin is-sharalar týraly sóz qozǵady. Onyń ishinde almatylyqtar arasynda ekologiialyq mádenietti, ásirese, sý únemdeý mádenietin damytýdyń ózektiligine toqtaldy.
– Reformanyń nátijesin ár otbasy sezinetindei bolýy kerek. Qoldaý shynymen muqtaj jandarǵa jetýi tiis, ekonomikalyq ósim jańa jumys ornyn ashýmen, naqty tabystyń artýymen qatar júrýi qajet. Almaty úshin sý qaýipsizdigi de asa mańyzdy: aýyz sýdy únemdep, múmkindiginshe tehnikalyq sýmen almastyrýymyz kerek, – dedi Aijan Sqaqova.
15 kezdesýge 2,5 myńǵa jýyq adam qatysty
Jalpy, Almatyda Prezident Joldaýynyń negizgi baǵyttaryn túsindirýge arnalǵan 15 kezdesý ótti. Olarǵa 2,5 myńǵa jýyq adam qatysty. Kezdesýlerge megapolistiń ár aýdanyndaǵy turǵyndar, biznes jáne ǵylymi qaýymdastyq ókilderi, áleýmettik sala, bilim berý, densaýlyq saqtaý, IT salasynyń mamandary men jastar tartyldy.
Ashyq dialog formatynda ótken júzdesýler qatysýshylarǵa ózderin tolǵandyrǵan suraqtardy qoiýǵa, Memleket basshysynyń negizgi bastamalary boiynsha túsinikteme alýǵa jáne ózekti máselelerdi sheshýge qatysty usynystaryn bildirýge múmkindik berdi. Kóterilgen barlyq pikir men usynys aldaǵy ýaqytta qaralyp, tiisti jumystar júrgizý úshin nazarǵa alyndy.
Mundai kezdesýler memleket pen qoǵam arasyndaǵy bailanysty nyǵaityp, azamattardyń júrgizilip jatqan reformalar týraly aqparattanýyn arttyrýǵa jáne el bolashaǵy úshin ortaq jaýapkershilikti qalyptastyrýǵa yqpal etedi. Sonymen qatar halyqtyń pikirin áleýmettik-ekonomikalyq damý basymdyqtaryn aiqyndaý jáne Prezident tapsyrmalaryn júzege asyrý barysynda eskerýge múmkindik beredi.
