Әлеуметтік желілерде курьер болып қосымша жұмыс істейтін аналарды әлеуметтік төлемдерден айыру жоспарланып жатқаны туралы ақпарат шындыққа жанаспайды, деп хабарлайды Dala News.
Еңбек және халықты әлеуметтік қорғау министрлігінің мәліметінше, бала күтімімен айналысатын жұмыссыз ата-аналарға республикалық бюджет есебінен бала бір жарым жасқа толғанға дейін мемлекеттік әлеуметтік жәрдемақы төленеді. Бұл төлемдер ешқандай шартсыз беріледі және алушы кейін жұмысқа орналасқан жағдайда да тоқтатылмайды.
Сондай-ақ міндетті әлеуметтік сақтандыру жүйесіне қатысатын жұмыс істейтін ата-аналарға Мемлекеттік әлеуметтік сақтандыру қорынан бала бір жарым жасқа толғанға дейін табысынан айырылуына байланысты әлеуметтік төлем тағайындалады. Оның мөлшері бала туғанға дейінгі соңғы екі жылдағы орташа айлық табыстың 40 пайызын құрайды.
Министрлік Әлеуметтік кодекс нормаларына сәйкес, мұндай төлемдерді тоқтату тек алушының өз еркімен жазған өтініші негізінде ғана жүзеге асырылатынын атап өтті.
Ведомство бұқаралық ақпарат құралдары мен әлеуметтік желі қолданушыларын ресми мәлімдемелерді түсіндіруде мұқият болуға және азаматтарды жаңылыстыратын тақырыптардан аулақ болуға шақырды.
Министрлік азаматтарға тек уәкілетті мемлекеттік органдардың ресми түсіндірмелеріне сүйенуге кеңес берді.
