Resei prezidentiniń baspasóz hatshysy Dmitrii Peskov eliniń Túrki memleketteri uiymyna (TMU) qatysýy qisyndy ári oryndy bolar edi dep málimdedi, dep habarlaidy dalanews.kz.
Peskovtyń aitýynsha, Reseide túrki halyqtary tarihi turǵydan mekendeitin birneshe óńir bar, dep jazady «Vedomosti».
«Reseidiń Túrki memleketteri uiymyna qatysýyna kelsek, bizdiń elde halqy tarihi shyǵý tegi jaǵynan túrkilerge jatatyn birqatar óńir bar ekenin bilesizder», – dedi ol.
Sonymen birge Máskeýge uiymǵa qosylý jóninde ázirge resmi shaqyrtý túspegen. Kreml ókiliniń sózinshe, bul másele Qazaqstanmen ótetin bailanystar barysynda talqylanýy múmkin.
Eske salaiyq, Toqaev Reseidi Túrki memleketteri uiymyna qosýdy usynǵan bolatyn. Memleket basshysy bul bastamany Ankarada ótken uiymnyń 13-sammitinde kóterdi.
Toqaevtyń aitýynsha, Reseidi TMU+ formatyna qosý nemese uiym qyzmetine baqylaýshy retinde qatystyrý onyń halyqaralyq bedelin arttyrýǵa yqpal etýi múmkin.
