Májilistiń burynǵy depýtaty Samat Nurtaza Facebook paraqshasynda 123 kúnnen beri jumyssyz júrgenin aityp, osy ýaqyt ishinde basynan ótken jaǵdailardy bólisti, dep habarlaidy dalanews.kz.
Eks-depýtattyń sózinshe, buryn jii habarlasqan áriptesteri men sheneýnikterdiń kóbi qazir qońyraý shalýdy doǵarǵan.
"Jumyssyz jatqanyma 123 kún boldy. Buryn batareikasy tez otyratyn smartfonym qazir lám-mim tynysh, qýaty eki kúnge jetip jatyr. Adami keiip saqtap qalǵan 7–8 adamnan basqa eshkim habarlaspaidy. Ózim qońyraý shalsam, tutqany kóteretin áriptester men sheneýnikter telefon kótermeitin boldy", – dep jazdy Samat Nurtaza.
Onyń aitýynsha, qyzmetten ketkennen keiin ózgermeidi dep sengen keibir adamdar da teris ainalǵan. Buryn únemi bailanysta bolýǵa ýáde bergen vitse-ministrlerdiń de qazir habarlaspai ketkenin jetkizdi.
Samat Nurtaza mundai jaǵdai qazirgi Parlament depýtattarynyń da basynan ótýi múmkin ekenin alǵa tartty. Onyń paiymynsha, depýtattyq ókilettik aiaqtalǵannan keiin burynǵy qyzmetke qaita oralý qiyn. Sebebi ol orynǵa basqa adam taǵaiyndalyp qoiady.
"Eń qyzyǵy, bul qubylys qazirgi Quryltaidyń 145 depýtatynyń basynan ótetin jait. Tek ony olar ózderi bilmei otyr. Ornyńnan kettiń, depýtat boldyń. Al depýtattyqtan keiin qaitaiyn deseń, ornyńda adam otyr. Tuiyq", – dedi eks-depýtat.
Ol jumyssyz ótken 123 kúnniń ózine úlken ómirlik sabaq bolǵanyn atap ótti. Osy ýaqyt aralyǵynda kimniń shynaiy qarym-qatynasyn saqtaǵanyn, al kimniń tek laýazymyna qarap aralasqanyn túsingen.
Eks-depýtat memlekettik qyzmetkerlerdiń laýazymnan aiyrylǵysy kelmeýiniń astarynda tek aqsha, bilik nemese qyzmettik kabinet turmaǵanyn aitady. Onyń pikirinshe, adam úshin qoǵamǵa qajet ekenin seziný mańyzdy.
"Laýazym – kópshilik oilaityn naqty bir aqsha, bilik, kabinet emes eken. “Laýazym” – sotsiýmǵa kerek ekeniń, naqty óziń shegelegen ornyń eken. Adam sol óz ornyn joǵaltyp almaý úshin psihologiialyq maidanda kúresetin siiaqty. Qoǵamǵa kerek bolǵanyn seziný – sheneýniktiń basty dopingi", – dep jazdy ol.
Samat Nurtaza Qazaqstan jaǵdaiynda adam bilikke qajet bolýy nemese jeke kásippen ainalysýy kerek degen qorytyndyǵa kelgen.
"Toq eteri, Qazaqstannyń realizminde bilikke paidaly, qajet, erekshe kerek bolýyń kerek nemese jeke kásipke ketý kerek. Bul ómirde basqa nusqa joq siiaqty. Buiyrǵanyn kórermiz", – dedi ol.
Dalanews.kz tilshisi eks-depýtattan aldaǵy jospary jáne memlekettik qyzmetke qaita oralý múmkindigi týraly surady. Alaida Samat Nurtaza ázirge bul máselege qatysty naqty jaýap bere almaitynyn aitty.
"Qazir eshteńe aita almaimyn", – dep jaýap berdi ol.
