VIII shaqyrylymdaǵy Májilis taratylyp, bir palataly Quryltai jasaqtalǵannan keiin burynǵy depýtattardyń edáýir bóligi jańa Parlament quramyna enbei qaldy. Birneshe jyl boiy el nazarynda júrip, ministrlerge saýal joldap, zań jobalaryn ázirleýge atsalysqan halyq qalaýlylarynyń mandattan keiingi joly ártúrli órbidi. Biri burynǵy kásibine oralsa, endi biri memlekettik qyzmetke aýysty. Al keibiri áli kúnge deiin turaqty jumys taba almai júr. Dalanews.kz redaktsiiasy ashyq derekterdi saralap, eks-depýtattardyń qazir nemen ainalysyp júrgenine jáne aldaǵy josparlaryna sholý jasady.
Samat Nurtaza jumyssyz júrgenin málimdedi
Burynǵy depýtattardyń tynys-tirshiligi týraly pikirtalastyń qaita jandanýyna Samat Nurtazanyń áleýmettik jelidegi jazbasy sebep boldy. Ol depýtattyq ókilettigi aiaqtalǵannan keiin 123 kún boiy jumyssyz júrgenin málimdedi.
Nurtazanyń aitýynsha, laýazymnan ketken soń buryn jii habarlasyp, jaqyn aralasqan adamdardyń qarym-qatynasy ózgergen. Qyzmette júrgende tolassyz qońyraý túsetin telefony qazir birneshe kún boiy únsiz qalǵanyn da jasyrmaǵan.
"Adami keiip saqtap qalǵan 7–8 adamnan basqa eshkim habarlaspaidy. Ózim qońyraý shalsam, tutqany kóteretin áriptester men sheneýnikter telefon kótermeitin boldy", – dep jazdy Samat Nurtaza.
Eks-depýtat bul jaǵdaidy tek óziniń basyndaǵy másele dep eseptemeidi. Onyń paiymynsha, qazirgi Quryltai depýtattary da ókilettik merzimi bitkende osyndai qiyndyqqa tap bolýy múmkin. Óitkeni depýtattyqtan keiin burynǵy qyzmetine oralýǵa niettengen adamnyń ornynda basqa maman otyrady.
Samat Nurtazanyń jazbasyna pikir bildirgen Nurtai Sabilianov burynǵy áriptesiniń kótergen máselesimen tolyq kelisetinin jazdy.
“Samat Rýslanuly, jazǵan postyńyzben tolyq kelisemin. Kótergen máseleńiz – shyndyq. Rasynda da, 2023-2026 jyldary Parlament Májilisiniń depýtaty bolǵan 30-dan astam áriptesimiz jumyssyz júr. Ol týraly sóilestik te”, – dedi Sabilianov.
Nurtai Sabilianov kásipkerlikke kirisken
Nurtai Sabilianov depýtattyq ókilettigi aiaqtalǵannan keiin Almatyǵa qonys aýdarǵan. Ol turaqty jumys izdeýge muqtaj emes ekenin, zeinetaqy alatynyn jáne jeke kásipkerlik baǵytynda eńbek ete bastaǵanyn jetkizdi.
“Parlament Májilisindegi depýtattyq ókilettigim aiaqtalǵannan keiin 259 myń teńge zeinetaqy alatynymdy, sondyqtan jumysqa ornalasýǵa muqtaj emes ekenimdi jazyp ketkenmin. Eki jarym ai buryn Almatyǵa kóship kelip, endi kásipkerlik sýbektisinde jumysymdy bastap jatyrmyn”, – dedi ol.
Budan bólek, ol Qazaqstan Halyq keńesiniń quramyna endi. Qazir Sabilianov osy organdaǵy Óńirlik damý jáne kásipkerlikti qoldaý máseleleri jónindegi komissiiany basqarady. Onyń jańa qoǵamdyq qyzmetiniń mazmuny da Májiliste basqarǵan Ekonomikalyq reforma jáne óńirlik damý komitetiniń baǵytymen sabaqtas.
Sońǵy málimdemeleriniń birinde ol "Halyqtyq qurylys" baǵdarlamasyna bólinetin biýdjet qarajatyna baqylaýdy kúsheitý jónindegi bastamany qoldaǵan edi. Baǵdarlama aiasynda 2027-2029 jyldary 6,5 trillion teńge igerý josparlanǵan.
"Ókinishke qarai, elimizde memlekettik qarajatqa qol suǵyp, sybailas jemqorlyqqa jol beretinder áli de az emes. Mundai komissiia qurý osyǵan uqsas quqyq buzýshylyqtardyń aldyn alýǵa baǵyttalǵan naqty qadam bolady dep sanaimyn", – dedi Sabilianov.
Ol óńirlerdegi aiaqtalmai qalǵan nysandar men tiimsiz jumsalǵan qarajat máselesin depýtat kezinde de birneshe márte kótergenin aitty. Sondai-aq memlekettik satyp alýdyń jekelegen adamdardyń paida tabý quralyna ainalýyna jol bermeitin tetikter qajet ekenin atap ótti.
Baqytjan Bazarbek zańgerlik qyzmetine qaita oraldy
Jer daýy, zańsyz qurylys jáne ekologiialyq máselelerdi jii kótergen Baqytjan Bazarbek Quryltai quramyna enbegenimen, onyń qoǵamdyq jáne kásibi belsendiligi báseńdegen joq.
Áleýmettik jelidegi paraqshasynda ol ózin jer quqyǵy salasynyń sarapshysy ári Bazarbek & Partners zań kompaniiasynyń basshysy retinde tanystyrǵan. Ashyq derekterde de Baqytjan Bazarbek osy kompaniianyń jetekshisi retinde kórsetilgen. Baiqaǵanymyzdai, depýtattyq mandaty aiaqtalǵannan keiin ol burynǵy zańgerlik jáne sarapshylyq qyzmetine qaita oralǵan.
Qazir Bazarbek jer jáne qurylys zańnamasyna qatysty saraptamalyq kezdesýler men iskerlik is-sharalarǵa qatysyp júr. 2026 jylǵy 19 qarashada Qytaida ótetin Qazaqstan men Qytaidyń qurylys salasyna arnalǵan halyqaralyq biznes-forýmda ol spiker retinde sóz sóileitinin habarlaǵan. Jiynda qurylys salasyndaǵy quqyqtyq ózgerister, salany damytý jáne halyqaralyq jobalardy júzege asyrý sharttary talqylanbaq. Forým uiymdastyrýshylary ony burynǵy depýtat, qoǵam qairatkeri jáne jer men qurylys zańnamasynyń sarapshysy retinde tanystyrǵan.
Buǵan deiin Bazarbek jol apatynan aýyr jaralanyp, komaǵa túsken Nurjigit esimdi azamattyń janynda bolý úshin Jambyl oblysynyń Qulan aýylyna ýaqytsha kóshkenin málimdegen edi. Ol naýqas esin jiǵansha aýylda qalatynyn aitqan.
Ermurat Bapi Halyq keńesine endi
Májilis minberinen saiasi jáne qoǵamdyq máselelerdi batyl kótergen Ermurat Bapi de jańa Quryltai quramyna enbedi. Eks-depýtattyń aitýynsha, oǵan ózge saiasi kúshterden usynystar túsken. Alaida ol Parlamentke qaita oralýdy kózdemegendikten, bul usynystardy qabyldamaǵan.
Qyrkúiekte Ermurat Bapi Qazaqstan Halyq keńesiniń quramyna qoǵamdyq qairatker retinde kirdi. Ol jańa organ qoǵam men bilik arasyndaǵy dialog alańy bolýy kerek dep esepteidi. Alaida keńestiń qyzmeti endi ǵana qalyptasyp kele jatqandyqtan, onyń naqty quzyreti men jumys tártibi tolyq aiqyndalmaǵanyn da jasyrmady.
Halyq keńesiniń músheleri turaqty jalaqy almaidy jáne qoǵamdyq negizde jumys isteidi. Sondyqtan Bapidiń negizgi kásibi baǵyty jýrnalistika jáne qoǵamdyq-saiasi qyzmet bolyp qala bermek.
Nartai Aralbaiuly jýrnalistika men ulttyq sportty qatar alyp júr
Nartai Aralbaiuly Májilisten ketkennen keiin birden jańa memlekettik qyzmetke ornalasqan joq. Ol ýaqytsha demalysta ekenin, alaida Respýblikalyq dástúrli sadaq atý federatsiiasynyń prezidenti retindegi qoǵamdyq jumysyn jalǵastyryp júrgenin aitty. Bul qyzmetke jalaqy tólenbeidi.
Nartai Aralbaiuly federatsiiany 2025 jylǵy tamyzdan beri basqarady. Onyń jetekshiligimen qazaqstandyq sportshylar VI Dúniejúzilik kóshpendiler oiyndaryna qatysyp, dástúrli sadaq atýdan tórt medal jeńip aldy.
Eks-depýtat jýrnalistikaǵa qaita oralýǵa da daiyn ekenin jetkizgen. Ol depýtat kezinde shyǵarmashylyq pen ustazdyq qyzmetke tyiym salynbaǵanyn, sondyqtan kásibi salasynan tolyq qol úzbegenin aitty.
“Men eshqashan jýrnalistikadan ketken joqpyn. Stýdiia, mátin jazý, efir júrgizý, shyǵarmashylyq ujymǵa jetekshilik etý – meniń stihiiam. Jýrnalistikadan eshqashan ketken joqpyn, ketpeimin de”, – dedi Nartai Aralbaiuly Zhasalash.kz-ge bergen suhbatynda.
Edil Jańbyrshin qoǵamdyq-saiasi qyzmetin jalǵastyrdy
Ekologiia, energetika, jylý júiesi, sý resýrstary, lýdomaniia jáne basqa da qoǵamdyq máselelerdi kótergen Edil Jańbyrshin “Ádilet” partiiasynyń tizimine enbedi ári Quryltai sailaýyna qatysqan joq.
Ókilettigi aiaqtalǵannan keiin ol jańa saiasi partiiaǵa qosylý múmkindigin qarastyryp júrgenin, alaida birden sailaýǵa qatysý jospary joq ekenin aitqan. Sondai-aq biraz ýaqyt demalatynyn jetkizgen.
Keiin Jańbyrshin Qazaqstan Halyq keńesiniń quramyna endi. Resmi tizimde ol “Salamatty El” qoǵamdyq qorynyń múshesi jáne qoǵam qairatkeri retinde kórsetilgen.
Iaǵni, ol zań shyǵarý organynan ketkenimen, qoǵamdyq-saiasi keńistikten alystaǵan joq. Májiliste jinaǵan tájiribesin endi konsýltativtik organ men qoǵamdyq qor aiasynda jalǵastyryp júr.
Abzal Quspan ǵylym men zańgerlikke den qoidy
Abzal Quspan depýtattyqtan keiin zań jáne ǵylym salasyndaǵy jumysyna tolyqtai bet burǵan. Eks-sheneýnik 2024 jyldan beri L.N.Gýmilev atyndaǵy Eýraziia ulttyq ýniversitetiniń Qylmystyq quqyq kafedrasynda doktorantýrada bilim alyp júr.
Sondai-aq ol burynnan jumys istep kele jatqan zań kompaniiasynyń qyzmetin qaita qolǵa alyp, tájiribeli mamandardan komanda jasaqtaýǵa kirisken.
Quspan merzimdi basylymdarǵa quqyqtyq taqyrypta maqalalar jazyp, qoǵamdyq pikirtalastarǵa da qatysyp júr.
Maqsat Tolyqbai ákimdikke aýysty
Burynǵy depýtat ári jýrnalist Maqsat Tolyqbai mandaty aiaqtalǵannan keiin Almaty oblysy ákiminiń keńesshisi bolyp taǵaiyndaldy. Bul málimet oblys ákimdiginiń resmi resýrsynda da kórsetilgen.
Jańa qyzmetinde ol oblystyń áleýmettik-ekonomikalyq damýyna qatysty máselelermen ainalysyp, óńirdegi qordalanǵan problemalardy sheshýge atsalysady. Tolyqbai depýtat kezinde Almaty oblysynyń áleýmettik jáne infraqurylymdyq máselelerin birneshe ret kótergen. Sondyqtan onyń jańa qyzmeti Májilistegi jumys baǵytynyń jalǵasy deýge bolady.
Erbolat Saýryqov bilim salasyna qaita oraldy
Erbolat Saýryqov depýtattyq ókilettigi aiaqtalǵannan keiin joǵary bilim salasyndaǵy qyzmetin jalǵastyrdy. Ol Sherhan Murtaza atyndaǵy Halyqaralyq Taraz ýniversitetiniń quryltaishysy ári oqý ornyn basqarý isine aralasyp júr.
Saýryqov buǵan deiin óziniń osy ýniversitet prezidenti qyzmetinde ekenin aitqan. 2026 jylǵy qazandaǵy is-sharalarda da ol ýniversitet basshylyǵy atynan sóz sóilegen. Onyń quryltaishy ekeni ashyq derekterde rastalǵan.
Dáýlet Muqaev bilim berý jáne qarjylai saýat baǵytynda júr
Dáýlet Muqaev depýtattyq qyzmetten keiin jańa qyzmetke ornalaspady. Ol burynnan ainalysyp kele jatqan bilim berý, qarjylai saýat jáne áleýmettik jelidegi aǵartýshylyq qyzmetine qaita oraldy.
Muqaev ýniversitette sabaq beretinin jáne talapkerlerdi UBT-ǵa daiyndaityn “Alǵyr” bilim berý ortalyǵyna jetekshilik etetinin aitqan.
Sonymen qatar áleýmettik jelidegi paraqshasynda ózin PhD, ekonomist jáne oqytýshy retinde tanystyrǵan. Qala berdi, qarjylai saýat, baspana, ipoteka jáne turmystyq ekonomikaǵa qatysty aqparattardy jariialaýdy jalǵastyryp júr.
Depýtattyq ókilettigi aiaqtalǵannan keiin Muqaev “Dáýletti saiahat” jobasyna da den qoiǵan.
