Qazaqstanda jeke tulǵalardyń mobildi aýdarymdaryna qatysty salyqtyq baqylaý shegi ulǵaidy. Endi úsh ai ishinde 1 million 557 myń teńgeden asatyn aýdarymdar tekserýge negiz bolýy múmkin, dep habarlaidy dalanews.kz.
Buǵan deiin baqylaý shegi úsh aida 1 million 20 myń teńge bolǵan. Endi bul soma 1 million 557 myń teńgege deiin kóterildi. Sonymen qatar shekti somany esepteý tártibi de ózgerdi. Buryn ol eń tómengi jalaqy mólsherimen eseptelse, endi ailyq eseptik kórsetkishke (AEK) bailanysty belgilenedi. Jańa shek – 360 AEK.
Alaida jeke tulǵanyń shotyna túsken kez kelgen aqsha avtomatty túrde tabys dep eseptelmeidi. Ol úshin úsh shart qatar oryndalýy kerek:
- Jeke shotqa 100 nemese odan da kóp ártúrli adamnan aqsha túsýi kerek;
- Aqsha aýdarymdary qatarynan úsh ai boiy ai saiyn jasalýy qajet;
- Úsh aidaǵy aýdarymdardyń jalpy somasy 1 million 557 myń teńgeden asýy tiis.
Iaǵni osy úsh talaptyń barlyǵy oryndalǵan jaǵdaida ǵana mobildi aýdarymdar kiris retinde qarastyrylyp, salyqtyq baqylaýǵa alynýy múmkin.
