Iemende hýsitter tutqynynda bolǵan BUU Adam quqyqtary jónindegi basqarmasynyń qyzmetkeri Muhammed ál-Shami qaitys boldy. Osyǵan bailanysty uiym táýelsiz tergeý júrgizip, qalǵan qyzmetkerlerdi bosatýdy talap etti, dep habarlaidy dalanews.kz.
BUU málimetinshe, Muhammed ál-Shami 2024 jylǵy 6 maýsymnan beri hýsitterdiń qolynda bolǵan. Onyń otbasy qyzmetkerdiń bir aidan astam ýaqyt buryn qaitys bolǵanyn jaqynda ǵana bilgen. Alaida óliminiń sebebi men mán-jaiy týraly olarǵa eshqandai aqparat berilmegen.
BUU-nyń Adam quqyqtary jónindegi Joǵarǵy komissary Folker Tiýrk hýsitter biliginen oqiǵany jedel, ashyq ári táýelsiz tergeýdi talap etti. Sondai-aq ol meditsinalyq jáne qamaýda ustaýǵa qatysty qujattardy jariialap, dálelderdi saqtaýdyń jáne ólimniń sebebin táýelsiz saraptaýdyń mańyzyn atap ótti.
BUU Bas hatshysy Antoniý Gýterrish te qyzmetkerdiń qazasyna bailanysty kóńil aityp, Iemendegi barlyq tutqyndalǵan uiym qyzmetkerlerin dereý bosatýǵa shaqyrdy.
Qazirgi ýaqytta hýsitter tutqynynda 70 BUU qyzmetkeri, uiymnyń burynǵy bes qyzmetkeri jáne ondaǵan gýmanitarlyq uiym men azamattyq qoǵam ókilderi qalyp otyr.
Iemendegi hýsitter 2014 jyly el astanasy Sana qalasyn basyp alǵannan keiin elde qarýly qaqtyǵys jalǵasyp keledi. 2024 jyly maýsymda hýsitter AQSh pen Izrailge qatysy bar tyńshylyq jelisine múshe degen aiyppen birqatar adamdy ustaǵanyn málimdegen.
BUU ustalǵan qyzmetkerlerdiń dereý ári eshqandai shartsyz bosatylýyn talap etip otyr.
