Йеменде хуситтер тұтқынында болған БҰҰ Адам құқықтары жөніндегі басқармасының қызметкері Мұхаммед әл-Шами қайтыс болды. Осыған байланысты ұйым тәуелсіз тергеу жүргізіп, қалған қызметкерлерді босатуды талап етті, деп хабарлайды dalanews.kz.
БҰҰ мәліметінше, Мұхаммед әл-Шами 2024 жылғы 6 маусымнан бері хуситтердің қолында болған. Оның отбасы қызметкердің бір айдан астам уақыт бұрын қайтыс болғанын жақында ғана білген. Алайда өлімінің себебі мен мән-жайы туралы оларға ешқандай ақпарат берілмеген.
БҰҰ-ның Адам құқықтары жөніндегі Жоғарғы комиссары Фолькер Тюрк хуситтер билігінен оқиғаны жедел, ашық әрі тәуелсіз тергеуді талап етті. Сондай-ақ ол медициналық және қамауда ұстауға қатысты құжаттарды жариялап, дәлелдерді сақтаудың және өлімнің себебін тәуелсіз сараптаудың маңызын атап өтті.
БҰҰ Бас хатшысы Антониу Гутерриш те қызметкердің қазасына байланысты көңіл айтып, Йемендегі барлық тұтқындалған ұйым қызметкерлерін дереу босатуға шақырды.
Қазіргі уақытта хуситтер тұтқынында 70 БҰҰ қызметкері, ұйымның бұрынғы бес қызметкері және ондаған гуманитарлық ұйым мен азаматтық қоғам өкілдері қалып отыр.
Йемендегі хуситтер 2014 жылы ел астанасы Сана қаласын басып алғаннан кейін елде қарулы қақтығыс жалғасып келеді. 2024 жылы маусымда хуситтер АҚШ пен Израильге қатысы бар тыңшылық желісіне мүше деген айыппен бірқатар адамды ұстағанын мәлімдеген.
БҰҰ ұсталған қызметкерлердің дереу әрі ешқандай шартсыз босатылуын талап етіп отыр.
