قازاقستاندا جەكە تۇلعالاردىڭ موبيلدٸ اۋدارىمدارىنا قاتىستى سالىقتىق باقىلاۋ شەگٸ ۇلعايدى. ەندٸ ٷش اي ٸشٸندە 1 ميلليون 557 مىڭ تەڭگەدەن اساتىن اۋدارىمدار تەكسەرۋگە نەگٸز بولۋى مٷمكٸن, دەپ حابارلايدى dalanews.kz.
بۇعان دەيٸن باقىلاۋ شەگٸ ٷش ايدا 1 ميلليون 20 مىڭ تەڭگە بولعان. ەندٸ بۇل سوما 1 ميلليون 557 مىڭ تەڭگەگە دەيٸن كٶتەرٸلدٸ. سونىمەن قاتار شەكتٸ سومانى ەسەپتەۋ تەرتٸبٸ دە ٶزگەردٸ. بۇرىن ول ەڭ تٶمەنگٸ جالاقى مٶلشەرٸمەن ەسەپتەلسە, ەندٸ ايلىق ەسەپتٸك كٶرسەتكٸشكە (اەك) بايلانىستى بەلگٸلەنەدٸ. جاڭا شەك – 360 اەك.
الايدا جەكە تۇلعانىڭ شوتىنا تٷسكەن كەز كەلگەن اقشا اۆتوماتتى تٷردە تابىس دەپ ەسەپتەلمەيدٸ. ول ٷشٸن ٷش شارت قاتار ورىندالۋى كەرەك:
- جەكە شوتقا 100 نەمەسە ودان دا كٶپ ەرتٷرلٸ ادامنان اقشا تٷسۋٸ كەرەك;
- اقشا اۋدارىمدارى قاتارىنان ٷش اي بويى اي سايىن جاسالۋى قاجەت;
- ٷش ايداعى اۋدارىمداردىڭ جالپى سوماسى 1 ميلليون 557 مىڭ تەڭگەدەن اسۋى تيٸس.
ياعني وسى ٷش تالاپتىڭ بارلىعى ورىندالعان جاعدايدا عانا موبيلدٸ اۋدارىمدار كٸرٸس رەتٸندە قاراستىرىلىپ, سالىقتىق باقىلاۋعا الىنۋى مٷمكٸن.
