Aqtaýda naýqas balanyń ákesi shabýyl jasaǵan balalar hirýrgi Qanat Ismail oqiǵanyń mán-jaiyn aityp berdi. Dáriger ózine taǵylǵan aiyptaýlarmen kelispeitinin málimdep, balany meditsinalyq talaptarǵa sáikes tekserýge jibergenin jetkizdi, dep habarlaidy Lada.kz.
Mańǵystaý oblystyq balalar aýrýhanasynyń qabyldaý bóliminde jumys isteitin hirýrg bloger Azamat Sársenbaevqa suhbat berip, naýqas balanyń ákesimen aradaǵy janjalǵa qatysty óz ustanymyn bildirdi.
20 jyldan astam eńbek ótili bar dárigerdiń aitýynsha, ony balanyń appenditsitin der kezinde anyqtamady dep aiyptap jatyr. Alaida Qanat Ismail naýqasty alǵash qabyldaǵan kezde bar bolǵany 15 minýttai qaraǵanyn aitady.
«Balany nebári 15 minýt kórdim»
Hirýrgtiń sózinshe, 19 qazanda saǵat 16:51 shamasynda qabyldaý bólimine naýqas bala jetkizilgen. Bul onyń jumys aýysymy aiaqtalýǵa jaqyn ýaqyt bolǵan.
«Men oblystyq balalar aýrýhanasynyń qabyldaý bóliminde hirýrg bolyp jumys isteimin. Hirýrgiialyq tájiribem 20 jyldan asady. Meni appenditsitti anyqtamady dep aiyptap otyr. Al men bul balany nebári 15 minýttai ǵana kórdim», – dedi Qanat Ismail.
Dáriger balany alǵashqy qaraýdan keiin qajetti tekserýlerdi taǵaiyndap, ony kelesi kezekshi dárigerler tobyna tapsyrǵanyn aitty.
Onyń sózinshe, odan keiin naýqastyń emdeý protsesine qatyspaǵan.
Sondai-aq hirýrg balanyń keiin jasalǵan operatsiiasyna qatysqany týraly aqparatty joqqa shyǵardy.
«Ákesi maǵan tap berdi»
Qanat Ismail balanyń aýrýhanaǵa qaita jetkizilgen kezindegi jaǵdaidy da túsindirdi.
Onyń aitýynsha, bul ýaqytta balaǵa operatsiia jasalyp qoiǵan. Qaita qaralý barysynda dárigerler qajetti taldaýlar men rentgenologiialyq tekserýdi shamamen jarty saǵat ishinde ótkizgen.
Hirýrg naýqastyń ákesine balasynyń jaǵdaiyn túsindirmek bolǵan kezde janjal týyndaǵanyn málimdedi.
«30 minýt ishinde barlyq qajetti tekserýdi júrgizdik. Taldaýlar alyndy, rentgen jasaldy. Men ákesine balanyń buryn operatsiia bolǵanyn, qazirgi jaǵdaiynyń sebebi hirýrgiialyq emes, basqa aýrýlarmen de bailanysty bolýy múmkin ekenin túsindirmek boldym. Sol kezde ol maǵan tap berdi. Men onymen urysyp ta, janjaldasyp ta turǵan joqpyn», – dedi dáriger.
Hirýrgtiń aitýynsha, meditsinalyq qyzmetkerlerdiń áreketteri Densaýlyq saqtaý ministrligi bekitken talaptar men hattamalarǵa sáikes júrgizilgen.
«Osyndai jaǵdaidan keiin jumys isteýge qulshynysyń joǵalady»
Qanat Ismail bolǵan oqiǵanyń ózine psihologiialyq turǵydan aýyr tigenin jasyrmady.
Dáriger 20 jyldan astam ýaqyt boiy kóptegen balany emdegenin, alaida bir jaǵdaidyń jyldar boiǵy eńbegine kóleńke túsirgenine qynjylatynyn aitty.
«Bir soqqymen seniń bar eńbegiń men bilimińdi joqqa shyǵarǵanyn túsiný óte aýyr. Biz munda kúndiz-túni, keide táýlik boiy jumys isteimiz. Naýqas balalar kóp, árqaisysyna kómektesýge tyrysamyz. Biraq osyndai qarym-qatynastan keiin qolyńnan eshteńe kelmei qalǵandai sezinesiń. Budan keiin qalai jumys istep, adamdardyń júzine qaraisyń?» – dedi hirýrg.
Ol ish aýrýymen jetkizilgen balalardyń barlyǵynda birdei appenditsit anyqtalmaitynyn da túsindirdi.
Sondyqtan hirýrgiialyq aralasý týraly sheshim qabyldamas buryn balany tolyq tekserip, operatsiia jasaýǵa naqty meditsinalyq kórsetilim bar-joǵyn anyqtaý qajet ekenin atap ótti.
Aýrýhana dárigerdiń áreketinen zańbuzýshylyq anyqtamaǵan
Buǵan deiin Mańǵystaý oblysynyń densaýlyq saqtaý basqarmasy oqiǵaǵa qatysty túsinikteme bergen bolatyn.
Vedomstvonyń málimetinshe, 31 qazanda qabyldaý bóliminde bolǵan janjalǵa bailanysty beinebaqylaý kameralarynyń jazbalary zerttelgen.
Ishki tekserý nátijesinde hirýrgtiń tarapynan meditsinalyq etika talaptaryn buzý nemese janjalǵa arandatý áreketteri anyqtalmaǵan.
Al balanyń ákesi buǵan deiin dárigerdiń qarym-qatynasyna kóńili tolmaǵanyn aityp, janjaldyń týyndaýyn óz kózqarasy turǵysynan túsindirgen.
Oqiǵadan keiin er adam ustalyp, qylmystyq is qozǵaldy.
Qazirgi ýaqytta bolǵan jaǵdaiǵa qatysty tergeý júrgizilip jatyr. Kúdiktiniń áreketine túpkilikti quqyqtyq baǵany tergeý organdary men sot beredi.
