Túrkiia Prezidenti Rejep Taiip Erdoǵan Qazaqstannyń áýe keńistigi arqyly ushyp bara jatqan kezde Memleket basshysy Qasym-Jomart Toqaevqa arnaiy jedelhat joldady. Túrik kóshbasshysy Qazaqstan halqyna izgi tilegin bildirip, eki el arasyndaǵy dostyq qarym-qatynastyń mańyzyn atap ótti, dep habarlaidy dalanews.kz.
Bul týraly Qazaqstan Prezidentiniń keńesshisi – baspasóz hatshysy Aibek Smadiiarov málimdedi.
Onyń aitýynsha, Rejep Taiip Erdoǵan Koreia Respýblikasyna resmi saparmen bara jatqan kezde Qazaqstan aýmaǵy arqyly ushyp ótken. Osy sátte ol Qasym-Jomart Toqaevqa jyly lebizin joldaǵan.
Túrkiia Prezidenti jedelhatynda Qazaqstandy baýyrlas ári dostas memleket retinde atap, eki el basshylarynyń buǵan deiingi kezdesýlerin eske alǵan.
"Koreia Respýblikasyna resmi saparmen baǵyt alǵan men tarihi atamekenimiz – dostas ári baýyrlas Qazaqstan aýmaǵymen ushyp baramyn", – delingen Erdoǵannyń jedelhatynda.
Túrik kóshbasshysy biyl mamyr aiynda Qazaqstanǵa jasaǵan memlekettik sapary men Qasym-Jomart Toqaevtyń jaqynda Ankaraǵa barǵan saparynyń nátijelerine toqtalǵan.
Ol Túrki memleketteri uiymynyń XIII sammiti aiasyndaǵy kezdesýlerdi de jyly yqylaspen eske alǵan.
"Osy oraida, Sizdiń denińizge saýlyq, kóńilińizge qýanysh, al baýyrlas Qazaqstan halqyna baq-bereke tilegen izgi sálemimdi joldaǵym keledi", – dep jazdy Rejep Taiip Erdoǵan.
Óz kezeginde Qasym-Jomart Toqaev túrik kóshbasshysynyń jyly lebizine jaýap berdi. Memleket basshysy Qazaqstan halqyna joldanǵan izgi tilekter úshin jáne Ankaradaǵy sapar barysynda kórsetilgen qonaqjailyqqa rizashylyǵyn bildirdi.
"Koreia Respýblikasyna barar jolda Qazaqstannyń áýe keńistigi arqyly ushyp bara jatqan Túrkiia Prezidenti Rejep Taiip Erdoǵannan jyly lebizge toly habarlama aldym", – dep jazdy Prezident.
Qasym-Jomart Toqaev eki el basshylarynyń ózara saparlary Qazaqstan men Túrkiia arasyndaǵy bailanystyń joǵary deńgeide ekenin kórsetkenin atap ótti. Sondai-aq Qazaqstan men Túrkiia arasyndaǵy dostyq jáne strategiialyq áriptestik qatynastardy odan ári nyǵaitýǵa nietti ekenin jetkizdi.
