Balqashta Balkhash Tour Fest-2026 festivali men Halyqaralyq volontiorler jylyna orai uiymdastyrylǵan Halyqaralyq eriktiler forýmy ótýde, dep habarlaidy dalanews.kz.
Balqash kóliniń jaǵalaýyndaǵy aýqymdy is-shara Qazaqstan, Túrkiia, Úndistan, Ázerbaijan, Qyrǵyzstan, Túrikmenstan jáne Ózbekstannan kelgen jastardyń basyn qosty.
Kól jaǵalaýynda Balqash óńiriniń biregei tabiǵatyn beineleitin jańa kórneki nysan – «Balqash jolbarystary» paida boldy. Músindik kompozitsiia bir kezderi Balqash mańyn mekendegen Turan jolbarysyn eske salady.
Jyrtqyshtyń popýliatsiiasyn qaita qalpyna keltirý maqsatynda halyqaralyq baǵdarlama shamamen on jyldan beri júzege asyrylyp keledi.
Forým qatysýshylarymen Qaraǵandy oblysynyń ákimi Ermaǵanbet Bólekpaev kezdesip, beiresmi jaǵdaida pikir almasty.
– Bul halyqaralyq forým yntymaqtastyqty nyǵaitýǵa, turaqty damýǵa jáne búkil álem úshin qundy sanalatyn tabiǵi murany saqtaýǵa degen ortaq ustanymymyzdy aiqyn kórsetedi. Kezdesýdiń mańyzyn «Taza Qazaqstan» jalpyulttyq bastamasymen sabaqtastyǵy odan ári arttyra túsedi. Qasym-Jomart Toqaev birneshe ret atap ótkendei, «Taza Qazaqstan» – bul aýmaqtardy bir rettik tazalaý naýqany emes, qorshaǵan ortaǵa, qoǵamdyq keńistikterge jáne týǵan jerge janashyrlyqpen qaraýǵa negizdelgen jańa mádeniet pen ómir saltyn qalyptastyrýǵa baǵyttalǵan bastama. Qaraǵandy oblysy bul baǵdarlamaǵa belsendi qatysýda. Búgingi kúnge deiin 113 myńnan astam jas pen volontiordi qamtyǵan 176 ekologiialyq aktsiia uiymdastyryldy, – dedi óńir basshysy.
Forým baǵdarlamasy mazmundy ári aýqymdy.
Ekologiialyq bastamalardan bólek, pikirtalastar men tanymdyq interaktivti is-sharalar uiymdastyrylady.
Qatysýshylar qorshaǵan ortany qorǵaý jáne turaqty damý salasyndaǵy bilgen-túigenderimen, tyń ideialarymen jáne úzdik tájiribelerimen bólisedi.
– Bizdiń elimizde volonterlik qozǵalys jaqsy damyǵan. Qazaqstanda ótip jatqan halyqaralyq forýmǵa alǵash ret qatysyp otyrmyz. Óz tájiribemizben bólisip, ózge elderdiń ozyq tájiribesin úirengimiz keledi. Munda kóptegen jańa dúnielermen tanystyq. Ásirese Túrkiiadan kelgen eriktilerdiń taǵam qaldyqtaryn kádege jaratýǵa baǵyttalǵan jobasy qyzyǵýshylyq týdyrdy. Mundai kezdesýlerdiń paidasy zor ekeni sózsiz, – deidi Qyrǵyzstan delegatsiiasynyń jetekshisi Namyzbek Nýrdóólót.
«Taza Qazaqstan» ulttyq jobasy aiasynda eriktiler ekologiialyq aktsiialar ótkizip jatyr. Al erteń olar Tour Fest festivali ótip jatqan Balqash kóliniń jaǵajai aýmaǵyn tazalap, retke keltiredi.
