Qazaqstannyń jalpy ishki ónimi 2025 jyldyń qorytyndysy boiynsha 6,5%-ǵa ósti, dep habarlaidy Dala News.
Ulttyq ekonomika ministrliginiń málimetinshe, ósimge ónerkásip, kólik, qurylys jáne saýda salalary negizgi úles qosty.
Vedomstvo deregine sáikes, ónerkásip óndirisiniń indeksi 7,4%-dy qurady. Óńdeý ónerkásibinde 6,4%-dyq turaqty ósim tirkeldi. Azyq-túlik óndirisi 8,1%-ǵa, munai óńdeý ónimderi 5,9%-ǵa, himiia ónerkásibi 9,8%-ǵa, mashina jasaý salasy 12,9%-ǵa artty.
Kólik jáne qoimalaý salasynda ósim 20,4%-ǵa jetti. Bul júk jáne jolaýshy tasymaly kóleminiń artýymen bailanysty. Sondai-aq ekspeditsiialyq qyzmetter, áýejailar men qoimalar qyzmeti, astyq pen salqyndatylǵan júkterdi saqtaý qyzmetteri kólemi ulǵaiǵan.
Qurylys salasynda ósim 15,9%-dy qurady. Oǵan jaily mektepter, meditsinalyq nysandar, kólik jáne injenerlik infraqurylym jobalarynyń iske asyrylýy áser etken. Bir jylda paidalanýǵa berilgen turǵyn úi kólemi 20,1 mln sharshy metrge jetip, 2024 jylmen salystyrǵanda 5,1%-ǵa artqan.
Saýda salasy 8,9%-ǵa ósti. Kóterme saýda kóleminiń ulǵaiýyna astyq, jemshóp, mashina men jabdyqtar, dári-dármek, avtokólik, sút ónimderi, qant jáne konditerlik ónimder saýdasynyń artýy yqpal etken.
Aýyl, orman jáne balyq sharýashylyǵyndaǵy ósim 5,9%-dy qurady. Onyń ishinde ósimdik sharýashylyǵy 7,8%-ǵa, mal sharýashylyǵy 3,3%-ǵa ósken.
Aqparat jáne bailanys salasynda 3,6%-dyq ósim tirkeldi.
Ulttyq ekonomika ministrligi Memleket basshysynyń tapsyrmasyna sáikes ekonomikany ártaraptandyrý boiynsha júieli jumystar júrgizilip jatqanyn atap ótti.
