Qazaqstannyń 2027–2029 jyldarǵa arnalǵan respýblikalyq biýdjet jobasy Kýrýltai depýtattarynyń synyna ushyrady. Olar memlekettik shyǵyndardyń ulǵaiýy, kiristiń baiaý ósýi jáne qaryzǵa qyzmet kórsetýge jumsalatyn qarajattyń artýy eldiń qarjylyq múmkindigin shekteýi yqtimal ekenin aitty, dep habarlaidy dalanews.kz.
Quryltai tóraǵasynyń orynbasary Daniia Espaevanyń sózinshe, Úkimet munai kirisine táýeldilikti azaityp, biýdjet tártibin kúsheitýdi josparlap otyr. Alaida bul ózgeris negizgi qarjy kórsetkishteri ruqsat etilgen mejege barynsha jaqyndaǵan kezde bastalmaq.
2027 jylǵa arnalǵan memlekettik shyǵyn 30,2 trln teńge kóleminde belgilengen. Bul qoldanystaǵy fiskaldyq shekteýdiń eń joǵary deńgeiine teń. Biýdjet tapshylyǵy da ruqsat etilgen shekke jetip, jalpy ishki ónimniń 2,3 paiyzyn quraidy.
Qarjy ministrligi ázirlegen qolaisyz stsenarii júzege assa, tapshylyq qazirgi boljamdaǵy 4,6 trln teńgeden 5,6–6,5 trln teńgege deiin ósýi múmkin.
"Mundai jaǵdaida Úkimet biýdjet parametrlerin belgilengen shekte qalai saqtaidy? Menshikti kiristiń ósý qarqyny jetkiliksiz. Ol 19,9 trln teńgeni nemese jalpy ishki ónimniń 10 paiyzyn ǵana quraidy. Al memlekettik qaryzdy óteý men oǵan qyzmet kórsetýge osy kiristiń 40,6 paiyzy jumsalmaq. Qaryz júktemesi eldi damytýǵa baǵyttalýy tiis qarajatty yǵystyra bastady", – dedi Daniia Espaeva.
Talqylaý barysynda teńgeniń boljamdy baǵamyna da nazar aýdaryldy. Qarjy vitse-ministri Azamat Ámrin byltyrǵy esepteýlerde 2026 jylǵa arnalǵan dollar baǵamy 540 teńge deńgeiinde alynǵanyn aitty. Bul boljam 2025 jyldyń shilde-tamyz ailarynda, dollar 540–554 teńge aralyǵynda saýdalanǵan kezde jasalǵan.
Al 2027–2029 jyldarǵa arnalǵan jańa biýdjet jobasynda Úkimet bir dollardyń baǵamyn 480 teńge dep eseptep otyr. Depýtattar mundai boljamnyń qanshalyqty negizdi ekenine jáne valiýta naryǵyndaǵy yqtimal ózgerister biýdjet kórsetkishterine qalai áser etetinine alańdaýshylyq bildirdi.
