Oljas Bektenov Qyzylorda oblysyna jumys sapary barysynda Prezidenttiń agrarlyq sektorǵa sý únemdeý tehnologiialaryn engizý jónindegi tapsyrmalarynyń oryndalýyn tekserdi jáne óńirdiń sý sharýashylyǵy infraqurylymynyń jai-kúiimen tanysty.
Premer-ministr zamanaýi sý únemdeý tehnologiialaryn iske qosqan Shieli aýdanyndaǵy «Aqmaia» sharýa qojalyǵynyń egis alqaptarynda boldy. Sharýashylyqta kúrish, kúzdik bidai jáne jońyshqa ósiriledi, al sýarý úshin sýdy utymdy tutyný júieleri qoldanylady. Qoldanylǵan sheshimderdiń tiimdiligi osy jyldyń vegetatsiialyq kezeńiniń mysalynda kórsetildi.
Oljas Bektenov óńirdiń negizgi gidrotehnikalyq nysandarynyń jumysymen tanysty. Atap aitqanda, Syrdariia aýdanynda ornalasqan «Áitek» sý torabynyń jumysyn tekserdi. Sý toraby 2004 jyly SARATS jobasy aiasynda paidalanýǵa berilgen. «Áitek» arqyly 13 myń gektar egis alqaby men 3 319 gektar kól júiesi, sondai-aq 120,8 myń gektar shabyndyq jáne jaiylymdyq jerler sýmen qamtamasyz etiledi.
Premer-ministr Qyzylorda qalasy, Qyzylózek aýyldyq okrýgine qarasty 120 myń gektardan astam aýmaqtaǵy kól júiesi men jaiylymdyq jerlerdi sýmen qamtamasyz etetin Qaraózek arnasyna áýeden sholý jasady.
Qyzylorda sý torabyn aralaý barysynda sý resýrstary jáne irrigatsiia ministri Nurjan Nurjigitov pen oblys ákiminiń orynbasary Baqyt Jaqanov óńirdegi sý sharýashylyǵy jaǵdaiy men qazirgi qabyldanyp jatqan sharalar týraly baiandady. Qyzylorda sý toraby 1956 jyly paidalanýǵa berilgen jáne 120 myń gektar aýmaqty sýarýdy qamtamasyz etedi.
Sapar barysynda Premer-ministr Memleket basshysynyń sý únemdeý tehnologiialaryn qarqyndy túrde engizý jónindegi alǵa qoiǵan mindetine nazar aýdartty. Bul qazirgi gidrologiialyq jaǵdaida óte ózekti. Osyǵan bailanysty Úkimettiń basa kóńil bólip otyrǵany – aýyl sharýashylyǵy óndirýshilerin turaqty sýmen qamtý, sonyń ishinde olardy sýdy tiimdi paidalanýdyń zamanaýi tehnologiialaryna kezeń-kezeńimen kóshirý. Osy turǵyda 2024 jyly Sý jáne irrigatsiia ministrligi Aýyl sharýashylyǵy ministrligimen birlesip investitsiialyq sýbsidiialaý jáne sýarmaly sý erejelerine tiisti ózgerister engizgen bolatyn. Soǵan sáikes tamshylatyp jáne jańbyrlatyp sýarýdy engizgen sharýashylyqtarmen sýdy paidalanýǵa arnalǵan kelisimsharttar basymdyq berý tártibimen jasalady. Qalǵandary qaldyq sý kólemi jáne sýdy únemdeitin sheshimderge kóshý mindettemesi bolǵan jaǵdaida ǵana sý resýrstaryn ala alady.
Egistik qurylymyn ártaraptandyrý jumystary júieli júrgizilýde. AÓK-ti damytýdyń 2030 jylǵa deiingi tujyrymdamasyna sáikes ylǵalsúigish daqyldardyń alqaptaryn qysqartý kózdelip otyr. Atap aitqanda, kúrish pen maqta alqaby 41 myń gektarǵa, onyń ishinde kúrish alqaby 10 myń gektarǵa azaitylmaq.
Sonymen birge júgeri men jem-shóp daqyldarynyń óndirisi keńeiip, aýyl sharýashylyǵy ónimderin tereń óńdeý salasy damýda. Bul sharalar sýarmaly jerlerdegi sý tutynýdyń úlesin kem degende 20%-ǵa tómendetýge baǵyttalǵan. Óńirde sý balansynyń turaqtylyǵyn qamtamasyz etý úshin melioratsiia boiynsha sharalar engizilýde. Máselen, Túrkistan jáne Qyzylorda oblystarynda 118 tik drenaj júiesi jáne 243 sorǵy agregaty iske qosyldy. Kollektorlyq-drenajdy sýdy qaita paidalaný júzege asyrylady jáne kezektestire ári túngi sýarý júiesi tájiribeden ótýde.
Sapar qorytyndysy boiynsha Oljas Bektenov sýdy tiimdi paidalaný tájiribesin keńeitý jáne sharýalardy sýarýdyń zamanaýi ádisterine kóshýge yntalandyrý qajettigin atap ótti. Jalpy alǵanda, Úkimet bul baǵyttaǵy jumysty óńirlermen, jaýapty ministrliktermen jáne sý paidalanýshylarmen úilestire otyryp jalǵastyratyn bolady.
