Búgin oblys ákiminiń orynbasary Meirambek Shermaǵanbet, quqyq qorǵaý organdarynyń basshylary, ziialy qaýym ókilderi, ardagerlerdiń qatysýymen "Taǵzym alańynda" 9 mamyr – Jeńis kúnine arnalǵan «Urpaqqa uran bolǵan Uly Jeńis» atty saltanatty shara ótti, dep habarlaidy dalanews.kz.
«Prezident Qasym-Jomart Kemeluly: «Biz otandastarymyzdyń qaitpas qaisarlyǵy men qajyrly eńbegin eshqashan umytpaimyz. Janqiiarlyq pen erliktiń ozyq úlgisin kórsetken batyrlarymyzdyń esimin árdaiym ulyqtaimyz. Ardagerlerimizge qamqorlyq jasap, qoldaý bildiremiz», - degen bolatyn.
Maidangerlerdiń eren erligin, sheksiz batyrlyǵyn jadymyzda jańǵyrtý, olardy máńgi este saqtaý – qasietti boryshymyz.
El basyna kún týyp, er etigimen qan keshken qiyn-qystaý zamanda dańqty babalarymyz batyrlyq pen janqiiarlyqtyń jarqyn úlgisin kórsetti.
Búgingi urpaq beibitshilik aspany astynda, ashtyq pen sýyqty, surapyl soǵystyń zulmatyn kórmei, Táýelsiz Otanymyzda alańsyz ómir súrýde.
Batyr babalarymyz qol jetkizgen qasietti de uly erlik el jadynda máńgi saqtalady! Barshańyzdy Jeńis kúnimen quttyqtaimyn! Táýelsizdigimiz tuǵyrly, egemendigimiz eńseli bolǵai!»- dedi Meirambek Zinabdinuly.
Saltanatty sharada soǵys qaharmandary qurmetine bir minýt únsizdik jariialanyp, Máńgilik alaýǵa gúl qoiyldy.
Eske salaiyq, soǵys jyldary Qyzylorda oblysynan 70 myńnan astam azamat maidanǵa attanǵan. Onyń 30 myńnan astamy qaza taýyp, habar-osharsyz ketken, 22 azamat Keńes Odaǵynyń Batyry atanyp, 20 myńnan astam jaýynger túrli orden-
medaldarmen marapattalǵan.
