Keńes Odaǵynyń Batyry Áliia Moldaǵulovanyń bala kúngi dosyna jazǵan haty kópshilikke usynyldy, dep dalanews.kz tilshisi 24KZ arnasyna silteme jasap habarlaidy.
Telearna málimetinshe, batyr qyzdyń hattarymen Aqtóbedegi Áliia Moldaǵulovanyń memorialdyq mýzeiinde tanysýǵa bolady. Murajai qorynda buǵan deiin onyń naǵashylary Sapýra men Bisembai Qabievke joldaǵan jeti hattyń kóshirmesi saqtalǵan.
Al jýyrda mýzei qyzmetkerleri memlekettik arhivten buryn kópshilikke belgisiz bolyp kelgen segizinshi hatty tapqan. Qundy qujat belgili jýrnalist ári derekti filmder stsenarisi Seiilhan Asqarovtyń jeke arhivinde saqtalyp kelgen.
Hatta Áliia bala kúngi dosy Olegke snaiperler mektebinde oqyp júrgenin jáne jaqyn arada maidanǵa attanatynyn jazǵan.
"Men snaiperler mektebinde oqyp júrmin. Ári qarai Otan qorǵaýǵa baramyn. Birneshe ret áskeri komissariatqa bardym, jasym kelmegendikten qaitaryp jiberdi. Biraq meniń ózimniń tabandylyǵymnyń arqasynda osyǵan qol jetkizdim", – dep sondai qýanyshyn bólisken.
Sonymen qatar belgili jazýshy Arkadii Gaidardyń sózin de keltirip jazǵan. "Sol úndeý maǵan óte áserli boldy jáne meniń de ómirime áserin berdi", – dep Olegke jazady.
Sondai-aq hatta ol jazýshy Arkadii Gaidardyń sózderiniń ózine erekshe áser etkenin de aitqan.
Mýzei qyzmetkeri Aisulý Turalievanyń aitýynsha, hat shamamen 1943 jyly, Áliia mergender mektebin úzdik támamdaǵan kezeńde jazylǵan.
Batyr qyz qysqa ǵana hatynda dosyna degen saǵynyshyn, týǵan jerge degen súiispenshiligin jáne el qorǵaýǵa degen jigerin jetkizgen. Kóp uzamai ol 54-arnaiy atqyshtar brigadasynyń quramynda maidanǵa attanǵan.
Áliia Moldaǵulovanyń hattary týǵan elge degen ystyq sezim men erlik rýhyna toly. Onyń jazbalarynda Abai óleńinen alynǵan myna joldar da kezdesedi:
"Bul ómirdiń qyzyǵy mahabbatpen
Kórge kirseń úlgili jaqsy ataqpen
Arttaǵyǵa sóziń men isiń qalsa
Ólseń de ólmegenge bolasyń teń".
Memorialdyq mýzeide batyrdyń hattarynan bólek, onyń ómir jolyna qatysty kóptegen tarihi derek saqtalǵan.
