Astanada Saltanat Núkenovanyń aǵasy Aitbek Amangeldi men Qýandyq Bishimbaevtyń ápkesi Arýjan Bishimbaeva arasyndaǵy áleýmettik jelidegi jazbalarǵa qatysty sot isi qaralyp, talap aryz ishinara qanaǵattandyryldy, dep habarlaidy dalanews.kz.
Sot Instagram jelisinde jariialanǵan birqatar málimdemeni shyndyqqa sáikes kelmeidi dep tanyp, olardy teriske shyǵarýdy mindettedi.
Eske salsaq, 2024 jyldyń mamyrynda burynǵy ulttyq ekonomika ministri Qýandyq Bishimbaev azamattyq jubaiy Saltanat Núkenovanyń ólimine bailanysty 24 jylǵa sottalǵan bolatyn. Osy oqiǵadan keiin eki otbasy arasyndaǵy pikirtalas qoǵam nazarynda qalyp otyr.
Ótken jyldyń kúzinde Aitbek Amangeldi "Ee zvali Saltanat" atty estelik kitabyn shyǵarǵan. Keiin Arýjan Bishimbaeva áleýmettik jelide bul kitapqa qatysty syni pikirler jariialap, avtordy tragediiany jeke paida úshin paidalandy dep aiyptaǵan.
Ol jazbalarynda Aitbek Amangeldini haip jasaý, bottardy paidalaný jáne halyqtyń janashyrlyǵyn qarjylyq maqsatta qoldaný sekildi áreketterge qatysy bar dep málimdegen.
Buǵan jaýap retinde Aitbek Amangeldi jariialanǵan málimdemelerdi notariýs arqyly rásimdep, sotqa júgingen. Ol bul aqparattardyń jalǵan ekenin jáne óziniń ar-namysyna nuqsan keltirgenin aitqan.
Sot barysynda saraptamalar taǵaiyndalyp, keibir pikirlerdiń naqty negativti mazmunǵa ie ekeni anyqtalǵan. Nátijesinde sot talap aryzdy ishinara qanaǵattandyryp, Arýjan Bishimbaevadan saraptama jáne ókildik shyǵyndary úshin qarjy óndirip alý týraly sheshim shyǵardy.
Sonymen qatar moraldyq ziian retinde 100 teńge óndirý týraly da sheshim qabyldanǵan.
Aita keteiik, sot sheshimi ázirge zańdy kúshine engen joq.
