Búgin Memleket basshysy – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev XI halyqaralyq «Aibyn» áskeri-patriottyq jastar jiynynyń ashylý rásimine qatysty.
Biyl Qazaqstan, Ázerbaijan, Belarýs, Qyrǵyzstan, Resei jáne Ózbekstan elderiniń áskeri-patriottyq qozǵalystaryna múshe 800-ge jýyq jastyń basyn qosqan is-shara Aqtóbe oblysynda uiymdastyrylyp otyr.
Slet qos ataýly dataǵa – Uly Jeńistiń 80 jyldyǵyna jáne qazaq halqynyń batyr qyzy Áliia Moldaǵulovanyń 100 jyldyq mereitoiyna arnalady.
Qasym-Jomart Toqaev barsha qatysýshylardy «Aibyn» áskeri-patriottyq jastar jiynynyń ashylýymen quttyqtap, bul jas órenderimizdiń rýhyn shyńdaityn óte mańyzdy is-shara ekenine nazar aýdardy.
– Biyl «Aibyn» jiyny qazaqtyń qaisar qyzy, Keńes Odaǵynyń Batyry Áliia Moldaǵulovanyń týǵanyna 100 jyl tolýyna arnalyp otyr. Erjúrek mergen qyzdyń erligi halqymyzdyń jáne dostas elderdiń tarihyna altyn árippen jazylǵan. Qazaqtyń qarshadai qyzy soǵysqa attanyp, birden qan maidannyń ortasyna tústi. Ol surapyl shaiqastarda teńdessiz erlik pen Otan aldyndaǵy paryzǵa adaldyq úlgisin kórsetti. Biyl Uly Jeńiske – 80 jyl! Bul – bizdiń elderimizge ortaq tarihi mereke. Uly Jeńis kúnin atap ótý – batyr babalardyń rýhyna taǵzym etý, olardyń erligin jadymyzda jańǵyrtý degen sóz. Qazaqstan úshin munyń mán-maǵynasy airyqsha. Halqymyz Uly Jeńiske ólsheýsiz úles qosty, azattyq pen ádildik úshin aianbai kúresti. Qazaqstannan 1 million 200 myń azamat maidanǵa attandy, onyń teń jartysy erlikpen qaza tapty. Myńdaǵan adam dalada, zaýyttar men fabrikalarda eńbek etip, maidanǵa azyq-túlik, qarý-jaraq jáne oq-dári jiberdi. Biz dańqty erlerimiz ben tyl eńbekkerlerin eshqashan umytpaimyz, olardyń esimin máńgi este saqtaimyz. Batyrlarymyz jer-jahandaǵy beibitshilik pen tynyshtyq úshin asa aýyr synaqtardy eńserdi, – dedi Memleket basshysy.
