بۇگىن مەملەكەت باسشىسى – قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆ XI حالىقارالىق «ايبىن» اسكەري-پاتريوتتىق جاستار جيىنىنىڭ اشىلۋ راسىمىنە قاتىستى.
بيىل قازاقستان، ازەربايجان، بەلارۋس، قىرعىزستان، رەسەي جانە وزبەكستان ەلدەرىنىڭ اسكەري-پاتريوتتىق قوزعالىستارىنا مۇشە 800-گە جۋىق جاستىڭ باسىن قوسقان ءىس-شارا اقتوبە وبلىسىندا ۇيىمداستىرىلىپ وتىر.
سلەت قوس اتاۋلى داتاعا – ۇلى جەڭىستىڭ 80 جىلدىعىنا جانە قازاق حالقىنىڭ باتىر قىزى ءاليا مولداعۇلوۆانىڭ 100 جىلدىق مەرەيتويىنا ارنالادى.
قاسىم-جومارت توقايەۆ بارشا قاتىسۋشىلاردى «ايبىن» اسكەري-پاتريوتتىق جاستار جيىنىنىڭ اشىلۋىمەن قۇتتىقتاپ، بۇل جاس ورەندەرىمىزدىڭ رۋحىن شىڭدايتىن وتە ماڭىزدى ءىس-شارا ەكەنىنە نازار اۋداردى.
– بيىل «ايبىن» جيىنى قازاقتىڭ قايسار قىزى، كەڭەس وداعىنىڭ باتىرى ءاليا مولداعۇلوۆانىڭ تۋعانىنا 100 جىل تولۋىنا ارنالىپ وتىر. ەرجۇرەك مەرگەن قىزدىڭ ەرلىگى حالقىمىزدىڭ جانە دوستاس ەلدەردىڭ تاريحىنا التىن ارىپپەن جازىلعان. قازاقتىڭ قارشاداي قىزى سوعىسقا اتتانىپ، بىردەن قان مايداننىڭ ورتاسىنا ءتۇستى. ول سۇراپىل شايقاستاردا تەڭدەسسىز ەرلىك پەن وتان الدىنداعى پارىزعا ادالدىق ۇلگىسىن كورسەتتى. بيىل ۇلى جەڭىسكە – 80 جىل! بۇل – ءبىزدىڭ ەلدەرىمىزگە ورتاق تاريحي مەرەكە. ۇلى جەڭىس كۇنىن اتاپ ءوتۋ – باتىر بابالاردىڭ رۋحىنا تاعزىم ەتۋ، ولاردىڭ ەرلىگىن جادىمىزدا جاڭعىرتۋ دەگەن ءسوز. قازاقستان ءۇشىن مۇنىڭ ءمان-ماعىناسى ايرىقشا. حالقىمىز ۇلى جەڭىسكە ولشەۋسىز ۇلەس قوستى، ازاتتىق پەن ادىلدىك ءۇشىن ايانباي كۇرەستى. قازاقستاننان 1 ميلليون 200 مىڭ ازامات مايدانعا اتتاندى، ونىڭ تەڭ جارتىسى ەرلىكپەن قازا تاپتى. مىڭداعان ادام دالادا، زاۋىتتار مەن فابريكالاردا ەڭبەك ەتىپ، مايدانعا ازىق-تۇلىك، قارۋ-جاراق جانە ءوق-دارى جىبەردى. ءبىز داڭقتى ەرلەرىمىز بەن تىل ەڭبەككەرلەرىن ەشقاشان ۇمىتپايمىز، ولاردىڭ ەسىمىن ماڭگى ەستە ساقتايمىز. باتىرلارىمىز جەر-جاھانداعى بەيبىتشىلىك پەن تىنىشتىق ءۇشىن اسا اۋىر سىناقتاردى ەڭسەردى، – دەدى مەملەكەت باسشىسى.
