Premer-ministr Oljas Bektenov áleýmettik jelilerde beiádep, balaǵat sóz qoldanǵany úshin ákimshilik jaýapkershilik engizýdi kózdeitin zań jobasy daiyndalyp jatqanyn málimdedi, dep habarlaidy dalanews.kz.
Úkimet basshysynyń aitýynsha, qujatty biylǵy maýsym aiynda parlament qaraýyna engizý josparlanǵan.
Zań jobasy qoldanystaǵy Ákimshilik quqyq buzýshylyq týraly kodekstiń 434-babyna tolyqtyrýlar engizýdi kózdeidi. Qazirgi tańda bul bap qoǵamdyq oryndardaǵy usaq buzaqylyq áreketterin retteidi.
Jańa normalar qabyldanǵan jaǵdaida áleýmettik jelilerde balaǵat sóz qoldanǵan azamattarǵa 20 ailyq eseptik kórsetkish (AEK) kóleminde aiyppul salynýy múmkin. Sonymen qatar 20 saǵattan 60 saǵatqa deiin qoǵamdyq jumystarǵa tartý nemese 5 táýlikten 15 táýlikke deiin ákimshilik qamaýǵa alý jazasy qarastyrylǵan.
