Búgin «Óner ortalyǵynda» 1 mamyr – Qazaqstan halqynyń birligi kúnine arnalǵan «Qazaqstan – dostyqtyń mekeni» atty saltanatty shara ótti, dep habarlaidy Dala News.
Oǵan oblys ákimi Nurlybek Nálibaev, quqyq qorǵaý organdarynyń basshylary, ziialy qaýym ókilderi qatysty.
Aimaq basshysy óńir turǵyndaryn beibitshiliktiń, kelisimniń mereili merekesimen quttyqtady.
«Memleket basshysynyń bastamasymen, halyqtyń qoldaýymen qabyldanǵan jańa Konstitýtsiiamyzǵa sáikes, qoǵam men bilik arasyndaǵy bailanysty nyǵaitý maqsatynda elimizde Halyq keńesi institýty qurylýda. Bul bastama turǵyndarymyzdyń usynys-pikirin eskerip, eldik máselelerdi jurtshylyqpen birge talqylaýǵa negizdelgen ádiletti qoǵam qalyptastyrýdyń mańyzdy tetigi bolmaq.
Bir jaǵadan bas, bir jeńnen qol shyǵaryp, judyryqtai jumyla bilgenniń arqasynda ortaq múdde jolyndaǵy qiyndyqtardy qaiyspai kóterip, qýanyshymyzdy birge bólisip, aq nietimizdi, asyl qasietterimizdi tanytyp kelemiz. Bul – tili basqa bolsa da tilegi bir, júzi basqa bolsa da júregi bir jurtymyzdyń ainymas birliginiń dáleli.
Elimizdegi etnosaralyq dostyq pen birliktiń úlgisin álemge tanytqan Qazaqstan halqy Assambleiasynyń 30 jyldyǵyna orai «Qazatomónerkásip» ulttyq atom kompaniiasynyń demeýshiligimen qalamyzda 3 mlrd. 800 mln. teńgege salynǵan «Dostyq úiiniń» zamanaýi, sáýletti, jańa ǵimaraty el igiligine tabystaldy. Bul – aimaǵymyzdyń birligi men yntymaǵyn nyǵaitýǵa atsalysqan etnomádeni birlestikter men Assambleia belsendileri úshin barlyq qajettiliktermen qamtamasyz etilgen zamanaýi ǵimarat.
Barshańyzdy 1 mamyr – Qazaqstan halqynyń birligi kúnimen shyn júrekten quttyqtaimyn! Egemen elimizdiń eńsesi biik, Táýelsizdigimizdiń tuǵyry berik bolǵai!»,– dedi Nurlybek Mashbekuly.
Saltanatty sharada beibitshilik pen dostyqty nyǵaitýǵa, aimaqtyń áleýmettik-ekonomikalyq damýyna eleýli úles qosqan azamattarǵa oblystyń Qurmet gramotasy men oblys ákiminiń Alǵys haty tabystaldy.
Merekede oblystyq koreiler qaýymdastyǵynyń «Han» bi ansambli korei biin, «Slavian» etnomádeni birlestiginiń «Sýdarýshki» vokaldyq toby «Prazdniki» ánin oryndap, kontserttik baǵdarlama grýzin biimen jalǵasty.
Óńirde 11 etnomádeni birlestik pen 9 qoǵamdyq qurylym bar. Olar etnosaralyq tatýlyqty nyǵaitýǵa, qoǵamdyq kelisimdi saqtaýǵa jáne el birligin bekemdeýge baǵyttalǵan mańyzdy bastamalardy júzege asyryp keledi.
Assambleia janyndaǵy ǵylymi-sarapshylyq toptyń qatysýymen halyqaralyq ǵylymi-tanymdyq konferentsiia, «Syr eli – dostyq mekeni» respýblikalyq Assambleia jastary forýmy, «Dostyq kerýeni» baiqaýy jáne «Birligi bekem Syr eli» respýblikalyq forýmy uiymdastyryldy.
Tatar etnomádeni birlestiginiń 35 jyldyq mereitoiy halyqaralyq deńgeide atalyp ótti. Sharaǵa Tatarstan Respýblikasynan arnaiy qonaqtar qatysyp, el birligi men shynaiy dostyqtyń mańyzyn aiqyndaǵan taǵylymdy basqosý boldy.
Qyzylordaǵa erekshe arhitektýralyq sán bergen «Dostyq úiiniń» jańa ǵimaratynda etnos ókilderiniń jastaryna arnalǵan shyǵarmashylyq úiirmeleri, mediatsiia ortalyǵy, mýzei, Assambleia janyndaǵy ǵylymi sarapshylyq toptar jumys isteidi. Jańa nysan azamattyq qoǵam institýttarynyń basyn qosatyn, jańa bastamalardy damytatyn ortalyqqa ainaldy.
Barlyq aýdandaǵy jańadan salynǵan «Rýhaniiat ortalyqtarynan» mýzei, kitaphana, arhiv, neke qiiý zaldary ashylǵan, ardagerler men analar keńesine, oǵan qosa etnomádeni birlestikterge, úkimettik emes uiymdarǵa da jabdyqtalǵan jumys kabinetteri berilgen. Ortalyqtardaǵy «Qoǵamdyq kelisim» kabinetteri etnos ókilderiniń mádeni-rýhani sabaqtastyǵyn saqtaýǵa qyzmet etedi.
Qyzylorda oblysy ákiminiń baspasóz qyzmeti
