Memleket basshysy Resei Federatsiiasynyń syrtqy ister ministri Sergei Lavrovty qabyldady, dep habarlaidy Dalanews.kz.
Qasym-Jomart Toqaev Reseidiń syrtqy saiasat vedomstvosynyń basshysyna iltipat bildirip, Qazaqstan men Resei arasyndaǵy qarym-qatynas strategiialyq seriktestik jáne odaqtastyq rýhynda damyp kele jatqanyn atap ótti.
Prezident buǵan deiin joǵary deńgeide qol jetkizilgen ýaǵdalastyqtardy naqty júzege asyrýdyń, sondai-aq saýda-ekonomikalyq, investitsiialyq jáne mádeni-gýmanitarlyq bailanystardy odan ári nyǵaitýdyń mańyzdy ekenin aitty.
Kezdesýde Resei Prezidenti Vladimir Pýtinniń mamyr aiynyń sońynda Qazaqstanǵa jasaityn saparyna daiyndyq máselesine erekshe nazar aýdaryldy.
Memleket basshysy Astana atalǵan ýaqiǵaǵa airyqsha mán berip otyrǵanyn jetkizdi.
"Bul sapardy biylǵy ekijaqty kún tártibiniń eń negizgi is-sharasy retinde qarastyramyz. Eki eldiń odaqtastyq qatynastaryn ilgeriletýde atalǵan sapar mańyzdy ról atqarady dep senemiz", – dedi Qasym-Jomart Toqaev.
Sergei Lavrov Memleket basshysyna Resei Prezidentiniń saparyna ázirlik barysy týraly aqparat berdi.
Sonymen qatar, Qazaqstan men Resei arasyndaǵy kópjosparly yntymaqtastyqtyń basty máseleleri úkimetter men syrtqy ister ministrlikteri deńgeiinde pysyqtalyp jatqanyna toqtaldy.
Qasym-Jomart Toqaev pen Sergei Lavrov halyqaralyq jáne aimaqtyq kún tártibindegi ózekti máseleler jóninde pikir almasty.
