Jetisý oblysynda Memleket basshysynyń tapsyrmasyna sáikes inkliýzivti sport kesheniniń qurylysy bastaldy. Osyǵan orai búgin Taldyqorǵan qalasyndaǵy qurylys alańyna Ýaqyt kapsýlasy salyndy, dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Saltanatty sharaǵa oblys ákimi Beibit Isabaev, «Qazaqstan halqyna» qorynyń Basqarma tóraiymy Lázzat Shyńǵysbaeva, erekshe qajettiligi bar sportshylar qatysty.
Aldymen jinalǵan qaýymdy jańa inkliýzivti nysan qurylysynyń bastalýymen oblys ákimi quttyqtady.
- Memleket basshysy Qasym-Jomart Kemeluly Toqaev inkliýzivti sport ortalyqtaryn ashý týraly tapsyrma bergen bolatyn. Soǵan sáikes búgin arnaiy sport kesheniniń qurylysyn bastap otyrmyz. Bolashaqta bul nysan 22 sport túrinen kásibi sheberlikti jetildirýge múmkindik beredi. Jalpy, bizdiń óńirde parasport qarqyndy damyǵan. Oblys qurylǵannan beri parasportshylarymyz túrli deńgeidegi jarystarda jalpy sany 1300-den astam medal ielendi. Men barlyq parasportshylarǵa ómirdiń túrli qiyndyqtaryna moiymai, sportpen ainalysyp, Qazaqstannyń atyn shyǵaryp, kók týymyzdy jelbiretip júrgeni úshin úlken alǵysymdy aitamyn. Biz budan bylai da parasportty ary qarai damytýdy jalǵastyramyz, - degen Beibit Isabaev osy jobaǵa qarjylai qoldaý kórsetken «Qazaqstan halqyna» qoǵamdyq qoryna shynaiy rizashylyǵyn bildirdi.
Munan soń sóz alǵan Qordyń Basqarma tóraiymy Lázzat Shyńǵysbaeva bul ortalyqty salý qoljetimdi ortany qalyptastyrý jolyndaǵy mańyzdy qadam ekendigin atap ótti.
- Biz buǵan deiin Astana jáne Qyzylorda qalalarynda osyndai inkliýzivti sport ortalyqtaryn saldyq, búgin úshinshi bolyp Taldyqorǵanda qurylysy bastalyp otyr. Bul jerde tek sportpen shuǵyldaný ǵana emes, sonymen qatar ońaltýǵa arnalǵan qural-jabdyqtar bolady, meditsina bólimderi qarastyrylady, óitkeni erekshe qajettiligi bar azamattar úshin onyń óz bekitilgen standarttary bar. Sol siiaqty qordyń qarjysyna Úshtóbede sport kesheni salynady, - dedi L. Shyńǵysbaeva.
Budan ári ishine keleshek urpaqqa arnalǵan amanat haty bar Ýaqyt kapsýlasyn salý rásimi atqaryldy.
Óz kezeginde parapaýerliftingiden Qazaqstan Respýblikasynyń eńbek sińirgen sport sheberi, Rio Paralimpiada oiyndarynyń kúmis júldegeri, Álem chempionatynyń jáne Qazaqstan Respýblikasynyń birneshe dúrkin chempiony Raýshan Qoishybaeva:
- Mundai qoldaý bizge, sportshylarǵa úlken motivatsiia beredi, kúsh-jigerimizdi eselei túsedi. Osydan birneshe jyl buryn Astanadaǵy paralimpiada jattyǵý ortalyǵyna kirgende keremet qyzyqqan edim. Ondai zalda sportshy barlyq jaǵynan yńǵaily bolǵandyqtan rahattanyp turyp jattyǵý jasaidy. Sol kezde bizde qashan salynady eken dep armandap edim. Búgin, mine, sol armanymyz oryndalatyn kúnge de jettik. Biz aldaǵy ýaqytta da halyqaralyq arenalarda barymyzdy salyp, eldiń namysyn abyroimen qorǵai beremiz, - dedi ol.
Saltanatty shara sońynda oblys ákimi men Qor basshysy sportshylarmen tildesip, jańa keshenniń múmkindikteri, budan bólek qolǵa alynatyn basqa da jobalar jaily baiandap berdi.
Jalpy aýdany 2 641 m² bolatyn inkliýzivti sport kesheninde ámbebap sport zaly, mamandandyrylǵan jattyǵý alańdary, kúres jáne kúshtik daiyndyq zaldary, oq atý tiri, sadaq atý alańy, meditsinalyq blok, sondai-aq jattyǵýlar, jarystar men ońaltý is-sharalaryn ótkizýge qajetti infraqurylym qarastyrylǵan. Nysan kedergisiz orta qaǵidattaryn eskere otyryp jobalanǵan jáne bir mezgilde 150-ge deiin kelýshini qabyldai alady. Ǵimarat halyqtyń júrip-turýy shekteýli toptaryna beiimdelgen jolaýshylar liftisimen jabdyqtalady.
Jobany iske asyrý erekshe qajettilikteri bar adamdardyń sportpen turaqty túrde ainalysýǵa tartylýyna, olardyń fizikalyq jáne psihologiialyq densaýlyǵyn nyǵaitýǵa, sondai-aq áleýmettik beiimdelý men qoǵamdyq ómirge qatysý múmkindikterin keńeitýge yqpal etedi.
Atap ótsek, qazirgi tańda oblystaǵy «Dene múmkindikteri shekteýli tulǵalarǵa arnalǵan sporttyq daiarlaý ortalyǵy» KMM-inde sportshylar sporttyń 24 túrimen shuǵyldanady. Sonyń ishinde paralimpialyq jáne paralimpialyq emes, sýrdlimpialyq jáne sýrdlimpialyq emes, arnaiy olimpiada sport túrleri bar. Qazirgi tańda ortalyqta 360 sportshy júieli túrde sportpen ainalysady. Onyń ishinde 287 sportshy - sporttyq ataqtar men sporttyq razriadtardyń iegerleri. Sol qatarda aýyr atletikadan Paralimpiada oiyndarynyń kúmis júldegeri Raýshan Qoishybaeva, grek-rim kúresinen Sýrdlimpiada oiyndarynyń qola júldegeri Ramazan Ábdrasil, parapaýerliftingten Álem chempiony Rahmetjan Hamaev siiaqty sport juldyzdary bar.
