Qazaqstanda dári-dármek baǵasy kúrt ósti degen aqparat shyndyqqa sáikes kelmeidi, dep habarlaidy Dala News.
Densaýlyq saqtaý ministrligi keibir BAQ-da jariialanǵan 52–66% ósim týraly málimetter rastalmaitynyn málimdedi.
Ministrliktiń resmi aqparaty boiynsha, naýqastarǵa túsetin qarjylyq júktemeni azaitý jáne negizsiz ústeme baǵalardy boldyrmaý úshin dárilerge shekti baǵa belgileý mehanizmi engizilgen. Qazir bólshek saýdada satylatyn 4994 dári ataýyna shekti baǵa bekitilgen.
20 óńirde júrgizilgen monitoring nátijesine sáikes, 2026 jyldyń naýryzynda 2025 jyldyń maýsymymen salystyrǵanda 631 dáriniń baǵasy orta eseppen 24,6%-ǵa tómendegen. Sonymen qatar dárilerdiń 50%-dan astamynyń baǵasy turaqty deńgeide saqtalǵan, al 25%-ynda tómendeý baiqalǵan.
Sonymen birge 1707 retseptisiz satylatyn dári memlekettik retteýge jatpaidy. Bul sanattaǵy preparattardyń baǵasy naryq qaǵidattaryna sáikes qalyptasady: keibirinde ósim 5–15% aralyǵynda bolsa, keibirinde 11%-ǵa deiin tómendeý tirkelgen.
Mysaly, paratsetamol baǵasy 200 teńgeden 188 teńgege deiin tómendegen, al belsendirilgen kómir 130 teńgeden 144 teńgege deiin qymbattaǵan.
Sondai-aq tirkelgen dárilerdiń 44%-y, iaǵni 3000-nan astamy QQS-tan bosatylǵan. Onyń ishinde áleýmettik mańyzy bar 1200 dári bólshek saýdada da salyqtan bosatylǵan.
Ministrlik dári baǵasyn retteý jáne halyqqa qoljetimdiligin qamtamasyz etý jumystary jalǵasatynyn atap ótti.
