Qazaqstannyń eki iri qalasy – Almaty men Astana Oxford Economics uiymynyń Global Cities Index 2026 reitinginde álemniń úzdik 300 qalasynyń qataryna kirdi. Jalpy reitingte álemniń 1000 qalasy baǵalanǵan, dep habarlaidy dalanews.kz.
Zertteý qorytyndysyna sáikes, Almaty 265-orynǵa turaqtasa, Astana 281-oryndy ielendi. Osy kórsetkishpen qos megapolis reitingtiń alǵashqy úshten bir bóligine endi.
Ult.kz jazýynsha, Ortalyq Aziia boiynsha da Almaty men Astananyń kórsetkishi joǵary boldy. Máselen, Tbilisi 287-orynǵa, Kiev 304-orynǵa, Máskeý 313-orynǵa, Baký 323-orynǵa jaiǵasty. Sankt-Peterbýrg 454-orynnan, Bishkek 461-orynnan kórindi.
Qazaqstandyq qalalar ásirese adami kapital baǵyty boiynsha joǵary nátije kórsetti. Bul sanatta Almaty álem boiynsha 66-oryndy, al Astana 98-oryndy ielendi.
Atalǵan kórsetkishti esepteý kezinde halyqtyń bilim jáne biliktilik deńgeii, eńbek naryǵynyń jaǵdaiy, kadrlyq áleýet, sondai-aq qalanyń mamandardy tartý jáne ustap qalý múmkindigi eskeriledi.
Al ekonomikalyq kórsetkish boiynsha Astana 264-orynǵa shyqsa, Almaty 288-orynǵa ornalasqan.
Global Cities Index qalalardy bes negizgi baǵyt boiynsha baǵalaidy. Olardyń qatarynda ekonomika, adami kapital, ómir súrý sapasy, ekologiialyq jaǵdai jáne basqarý júiesi bar.
2026 jylǵy reitingte alǵashqy úsh oryndy Niý-Iork, London jáne Parij saqtap qaldy. Al alǵashqy júzdikke engen qalalardyń basym bóligi Eýropa men Soltústik Amerikaǵa tiesili.
