Almatyda antibiotik ekpesinen keiin jaǵdaiy kúrt nasharlaǵan 14 jastaǵy jasóspirim qaitys boldy. Bala jeti kún boiy dárigerler baqylaýynda bolǵanymen, ony aman alyp qalý múmkin bolmaǵan. Qazir oqiǵaǵa qatysty qylmystyq is qozǵalyp, tergeý júrip jatyr, dep habarlaidy dalanews.kz.
Marqum Maksim segizinshi synypta oqyǵan. Sportpen ainalysyp, sýret salýdan qalalyq baiqaýlarda jeńiske jetken. Ol bolashaqta dáriger bolýdy armandap, anatomiia men biologiiany tereńdetip oqyǵan.
Ata-anasynyń aitýynsha, tamyz aiynyń basynda balanyń limfa túiinderi ulǵaiǵan. Osyǵan bailanysty olar birneshe meditsinalyq mekemege júgingen. Jasóspirim antibiotiktermen jáne basqa da dárilermen eki ret em qabyldaǵanymen, jaǵdaiy jaqsarmaǵan.
21 qazanda ata-anasy ony Almatydaǵy №37 qalalyq emhanaǵa aparǵan. Dáriger-infektsionist antibiotik taǵaiyndap, ekpe aldynda synama jasaý qajettigin eskertken. Alaida preparatty bulshyqetke engizgennen keiin balanyń jaǵdaiy kúrt nasharlaǵan.
Anasynyń sózinshe, jasóspirimniń júregi ainyp, búkil denesi syrqyraǵanyn aitqan. Keiin qurysyp, esinen tanyp qalǵan. Meditsina qyzmetkerleri oǵan shuǵyl kómek kórsetkenimen, jaǵdaiy jaqsarmaǵan.
Keiin bala Balalarǵa shuǵyl meditsinalyq kómek kórsetý ortalyǵyna jetkizilip, ókpeni jasandy jeldetý apparatyna qosylǵan. Dárigerler jeti kún boiy onyń ómiri úshin kúresken, alaida jasóspirimdi aman alyp qalý múmkin bolmady.
Marqumnyń ata-anasy balanyń aýyr allergiialyq reaktsiiaǵa ushyraýy múmkin ekenin aitady. Olar antibiotiktiń naqty qandai mólsherde egilgenin, meditsinalyq protsedýranyń talapqa sai júrgizilgenin jáne jaǵdaiy nasharlaǵan sátte shuǵyl kómektiń qanshalyqty ýaqytyly kórsetilgenin tekserýdi talap etip otyr.
Sondai-aq otbasy meditsinalyq qujattarda sáikessizdikter bar ekenin málimdedi. Atap aitqanda, ata-anasynyń aitýynsha, qujatta kórsetilgen dári mólsheri meditsina qyzmetkerleri ekpe aldynda talqylaǵan dozadan ózgeshe. Buǵan qosa, dári-dármek engizý jýrnalynyń keibir baǵandary toltyrylmaǵan.
Marqumnyń ákesi bul jaǵdai meditsinalyq mekemeler úshin sabaq bolyp, emhanalarda qaýipsizdik sharalaryn kúsheitýge yqpal etýi kerek ekenin aitty.
Almaty qalasynyń Qoǵamdyq densaýlyq saqtaý basqarmasy otbasyǵa kóńil aityp, tekserý nátijesi boiynsha qosymsha aqparat beriletinin habarlady.
Almaty qalalyq politsiia departamentiniń resmi ókili Saltanat Ázirbektiń málimetinshe, atalǵan derek boiynsha qylmystyq is qozǵalǵan. Qazir qajetti saraptamalar taǵaiyndalyp, oqiǵanyń barlyq mán-jaiy anyqtalyp jatyr.
