Májilistiń burynǵy depýtaty, kásipker Bolatbek Áliev Premer-ministrdiń orynbasary – Ulttyq ekonomika ministri Serik Jumanǵarinniń shtattan tys keńesshisi bolǵanyn málimdedi. Ol bul qyzmetti qoǵamdyq negizde atqaryp, jalaqy almaitynyn aitty, dep habarlaidy dalanews.kz.
Bolatbek Álievtiń sózinshe, ol jańa mindetine qyrkúiek aiynyń sońynda kirisken. Burynǵy depýtat Serik Jumanǵarinmen birneshe jyldan beri tanys ekenin jáne ekeýiniń buǵan deiin de ekonomikalyq máseleler boiynsha birlesip jumys istegenin jetkizdi.
Onyń aitýynsha, ministr kásipkerlik, aýyl sharýashylyǵy jáne halyqaralyq saýda salalaryndaǵy tájiribesin eskerip, keńesshi bolýdy usynǵan.
Atap aitqanda, 2024 jyly Bolatbek Áliev úkimettik delegatsiia quramynda Máskeýge baryp, Qazaqstan men Resei arasyndaǵy úkimetaralyq komissiianyń otyrysyna qatysqan. Sol kezde ol otandyq kásipkerlerdiń júk tasymaly men saýda salasynda kezdesetin máselelerin kótergen.
"Serik Maqashuly maǵan keńesshi bolýdy usynǵanda, tájiribemdi Úkimet jumysyna paidalanýǵa bolatynyn aitty. Kelisim berdim. Bul jumysty qoǵamdyq negizde atqaramyn, jalaqy almaimyn", – dep jazdy ol.
Eks-depýtattyń aitýynsha, jańa qyzmetinde eńbekaqy almaý ol úshin qiyndyq týǵyzbaidy. Sebebi kásipkerlikpen ainalysqan jyldary birneshe myń adamdy jumyspen qamtyǵan kásiporyndar quryp, qarjylyq táýelsizdikke qol jetkizgen.
Áliev bul jaǵdai óz ustanymyn erkin bildirýge jáne memlekettik organdardyń sheshimderine qatysty ashyq pikir aitýǵa múmkindik beredi dep esepteidi. Qazir ol memlekettik mekemelerden túsetin usynystar men bastamalardy zerdelep, olardyń qoǵam men bizneske yqpalyn taldaýmen ainalysyp júr.
"Olardyń halyq pen kásipkerlerge qalai áser etetini týraly pikirimdi bildirip, óz taldaýymdy usynamyn. Ózim jaqsy biletin salalardaǵy jetekshi mamandarmen aqyldasyp, qajet bolǵan jaǵdaida balama sheshimder usynamyn", – dep túsindirdi ol.
Bolatbek Áliev aldaǵy ýaqytta kásipkerlerdiń múddesin qorǵaý jáne ekonomikalyq sheshimderdiń tiimdiligin arttyrý baǵytynda jumys isteýdi josparlap otyr.
Onyń pikirinshe, bul rette kórshi memleketterdiń tájiribesin zerttep, Qazaqstan jaǵdaiyna sáikes keletin tetikterdi qoldaný mańyzdy.
Burynǵy depýtat keńesshilik qyzmetinde ónerkásip, aýyl sharýashylyǵy, qurylys jáne logistika salalarynda jinaqtaǵan tájiribesin paidalanýǵa nietti.
