Almatydaǵy ál-Farabi atyndaǵy Qazaq ulttyq ýniversitetiniń stýdenttik qalashyǵynda jýrnalistika fakýltetiniń birinshi kýrs stýdenti kóz jumdy. Qaiǵyly oqiǵanyń mán-jaiy ázirge belgisiz, dep habarlaidy dalanews.kz.
Derekkózdiń málimetinshe, oqiǵa 6 qarasha kúni keshki ýaqytta bolǵan. Shymkentten Almatyǵa jýrnalist mamandyǵyn meńgerý úshin kelgen qyzdyń qaitys bolǵany týraly habardan keiin stýdenttik qalashyqqa politsiia qyzmetkerleri men ýniversitet ókilderi barǵan.
Derekkózdiń aitýynsha, sol túni jataqhanada turatyn stýdentterge bólmelerinen shyǵýǵa jáne balkonǵa barýǵa ruqsat berilmegen. Qazir stýdenttiń óliminiń sebebi anyqtalǵan joq. Stýdentter arasynda ózine qol jumsaǵan bolýy múmkin degen boljam taraǵanymen, bul aqparat resmi túrde rastalmaǵan.
Sondai-aq derekkóz stýdentterden bolǵan oqiǵa týraly habarlamalardy ortaq chattardan óshirý suralǵanyn aitady. Olarǵa hat almasýlar tekserilýi múmkin ekeni eskertilgen.
Almaty qalalyq politsiia departamenti ázirge oqiǵaǵa qatysty resmi túsinikteme bergen joq.
