AQSh áskeri kúshteri Irannyń ońtústigindegi Keshm araly mańynda ornalasqan zenittik qondyrǵyny joidy. Bul týraly AQSh prezidenti Donald Tramp málimdedi, dep habarlaidy dalanews.kz.
Aq úi basshysynyń aitýynsha, amerikalyq áskeriler nysanǵa qysqa ýaqyt ishinde soqqy berip, ony isten shyǵarǵan.
«Biz shaǵyn soqqylar jasaimyz, biraq olardyń ózi nysandardy isten shyǵarady. Olar shaǵyn zenittik qondyrǵy ornatqan edi. Biz ony shamamen 15 minýtta, tipti bes minýttyń ishinde joidyq», – dedi Tramp jýrnalisterge.
Buǵan deiin, senbige qaraǵan túni Irannyń Ormýz buǵazyndaǵy Keshm aralynda birneshe jarylys bolǵany habarlanǵan. Keiin Press TV telearnasy Iran Islam revoliýtsiiasy saqshylar korpýsynyń áýe qorǵanysy kúshteri osy aýmaqta amerikalyq MQ-9 Reaper ushqyshsyz apparatyn ustap, joiǵanyn málimdedi.
Iran men AQSh arasyndaǵy shielenis álemdegi strategiialyq mańyzy joǵary teńiz joldarynyń biri – Ormýz buǵazy tóńireginde kúsheiip keledi.
Qyrkúiek aiynyń sońynda Tegeran Vashingtonǵa buǵazdy jeti kún ishinde ashý josparyn usynǵan. Onyń ornyna Iran teńiz blokadasy men eksportqa qoiylǵan shekteýlerdiń alynýyn talap etken. Alaida Donald Tramp bul usynysty qabyldamady.
Buǵan deiin Iran Ormýz buǵazy arqyly ótetin kemelerge qatań talap engizip, olardyń Tegeranmen aldyn ala kelisip, ruqsat alýyn mindettegen.
Iran biligi buǵaz tolyqtai óz baqylaýynda ekenin málimdep otyr. Al Islam revoliýtsiiasy saqshylar korpýsynyń áskeri-teńiz kúshteri aimaqtaǵy qaýipsizdikti qamtamasyz etip jatqanyn aitady.
