Qazaqstandaǵy sóz bostandyǵy, aqparat alý jáne taratý quqyǵyna qatysty bir aptadaǵy jaǵdaiǵa «Ádil sóz» halyqaralyq sóz bostandyǵyn qorǵaý qory sholý jasady, dep habarlaidy dalanews.kz.
Qor jýrnalisterge tóngen qaýipter men aqparatqa qol jetkizý máselelerine de nazar aýdardy, dep habarlaidy Dala News.
«Ádil sózdiń» málimetinshe, «Nasha gazeta» bas redaktory Gafýrovqa Telegram jelisindegi anonimdi qoldanýshydan qoqan-loqy jasalǵan. Belgisiz adam jýrnalistiń pikirlerdi moderatsiialaýyna narazy bolyp, oǵan jáne otbasy múshelerine kúsh qoldanatynyn aitqan. Habarlamalarda jýrnalist pen onyń otbasynyń turǵylyqty jeri týraly málimetter de bolǵan.
12 tamyzda advokat Anna Dýdina qoqan-loqy faktisi boiynsha politsiiaǵa júgingen. Alaida 8 qyrkúiekte istiń barysy týraly joldanǵan saýalǵa deiin bir ai boiy protsessýaldyq áreketter júrgizilmegeni aityldy. Qordyń habarlaýynsha, politsiia qylmystyq jáne ákimshilik zańnama aiasynda shara qoldanýdan bas tartqan.
Aptalyq sholýda jýrnalister Gúljan Erǵalieva, Aian Sháripbaev jáne «Sybailas jemqorlyqty tergeý biýrosy» saitynyń negizin qalaýshy Kirill Pavlovqa qatysty sot protsesteri de qamtylǵan.
Sonymen qatar ashyq sot otyrysyn jariialaýǵa qoiylǵan shekteýler, jýrnalist Dinara Egeýbaevaǵa qatysty jalǵan aqparattyń taralýy, memlekettik organdardyń saýaldarǵa jaýap berýdi sozýy jáne keibir BAQ ókilderine aqparat berýden bas tartý jaǵdailary keltirilgen.
Qor jýrnalisterden aqparat kózin ashýdy talap etý, sotta beinetúsirilim jasaýǵa shekteý qoiý, Total.kz saityna qoljetimdilik máselesi jáne birqatar qazaqstandyq jýrnalistiń akkaýnttarynyń buǵattalýy týraly da málimet bergen.
«Ádil sóz» sondai-aq Syrtqy ister ministrliginiń «Ashyq NQA» portalynda sheteldik BAQ ókildikteri men jýrnalisterin akkreditteý qaǵidalaryna ózgerister engizý týraly buiryq jobasy jariialanǵanyna nazar aýdardy.
Sholýda álem boiynsha táýelsiz BAQ-qa jasalyp jatqan qysym máselesi de kóterilgen. Qor Eýropalyq odaqtyń derekterine silteme jasap, jalǵan aqparattyń jyldam taralýy, jasandy intellekt pen algoritmder arqyly aqparatty manipýliatsiialaý demokratiialyq institýttarǵa degen senimge qaýip tóndiretin faktorlardyń qatarynda ekenin atap ótti.
