Premer-ministr Oljas Bektenov «Samuryq-Qazyna» qory men onyń enshiles kompaniialarynyń basshylyǵyn iri investitsiialyq jobalardyń ýaqytynda júzege aspaǵany úshin synǵa aldy. Úkimet basshysy birqatar nysannyń qurylys jáne iske qosý merzimderin qatań baqylaýǵa alýdy tapsyrdy, dep habarlaidy dalanews.kz.
«Samuryq-Qazyna» AQ direktorlar keńesiniń otyrysynda qordyń 2026 jyldyń toǵyz aiyndaǵy jumysy qorytyndylandy. Jiynda qarjylyq jáne óndiristik kórsetkishter, otandyq taýar óndirýshilerdi qoldaý sharalary, sondai-aq iri investitsiialyq jobalardyń júzege asý barysy talqylandy.
Qor basqarmasynyń tóraǵasy Nurlan Jaqypovtyń aitýynsha, esepti kezeńde qordyń túsimi 13 paiyzǵa, taza paidasy 19 paiyzǵa ósken. Negizgi óndiristik kórsetkishter boiynsha jospar oryndalǵan.
Otyrysta jalpy quny 43,8 trln teńge bolatyn 69 iri investitsiialyq jobanyń júzege asyrylý barysy da qaraldy. Investitsiianyń basym bóligi munai-gaz ónerkásibine, munai-gaz himiiasyna jáne dástúrli elektr energiiasyn óndirý salasyna baǵyttalǵan. Sonymen qatar gaz tasymaldaý jáne energetikalyq infraqurylym, kólik pen kommýnikatsiia baǵytyndaǵy jobalar da bar.
Qazir 44 joba boiynsha qurylys-montaj jumystary júrip jatyr. Qalǵan jobalar ázirge iske asyrýdyń ártúrli kezeńinde.
Qordyń biylǵy mańyzdy jobalarynyń qatarynda Qazaqstan men Ázerbaijan arasyndaǵy uzyndyǵy 380 shaqyrym bolatyn talshyqty-optikalyq bailanys jelisiniń iske qosylýy ataldy. Ol eki el arasyndaǵy derekter almasý múmkindigin keńeitýge baǵyttalǵan.
Sondai-aq qor Gonkong qor birjasy men «Astana» halyqaralyq birjasynda jalpy somasy 3 mlrd iýan bolatyn obligatsiialaryn alǵash ret ornalastyrǵan. Bul qadam halyqaralyq kapital naryǵyna shyǵý múmkindigin keńeitip, Qazaqstan ekonomikasyna qosymsha investitsiia tartýǵa jol ashpaq.
Kólik salasyndaǵy mańyzdy jobalardyń biri – Darbaza – Maqtaaral temirjol jelisi. Qazan aiynda osy baǵytpen Qazaqstan kómirin Ózbekstanǵa jetkizgen alǵashqy júk poiyzy jolǵa shyqty. Jańa temirjol jelisi júk tasymalynyń kólemin arttyryp, Ortalyq Aziia elderine otandyq ónim eksporttaýǵa múmkindik beredi.
Otandyq óndirýshilerdi qoldaý aiasynda qordyń qazaqstandyq kompaniialardan satyp alǵan taýarlary, jumystary men qyzmetteriniń kólemi toǵyz aida shamamen 1,4 trln teńgege jetken. Bul ótken jyldyń sáikes kezeńimen salystyrǵanda 45 paiyzǵa kóp. Al ofteik-kelisimsharttardyń kólemi 73 mlrd teńgeni quraǵan.
Budan bólek, qor jańa áleýmettik nysandardyń qurylysyn jalǵastyryp jatyr. 2027–2028 jyldary Astana, Túrkistan jáne Petropavl qalalaryndaǵy birqatar iri meditsinalyq nysandy aiaqtaý josparlanǵan. Sonymen qatar inkliýzivti sport, ońaltý, bilim berý jáne mádeniet salalaryndaǵy jobalar júzege asyrylmaq.
Jiyn qorytyndysynda Oljas Bektenov investitsiialyq jobalardyń merziminen keshigýine bailanysty qor basshylyǵy men enshiles kompaniialardyń jumysyn synǵa aldy.
Premer-ministr jobalardyń belgilengen merzimde aiaqtalýyn qatań baqylaýǵa alýdy jáne olardy júzege asyrý kezinde otandyq taýarlar, jumystar men qyzmetterdiń úlesin arttyrýdy tapsyrdy.
Ásirese Túrkistan, Qyzylorda, Almaty jáne Ekibastuz qalalarynda jańa elektr qýatyn óndirý nysandaryn iske qosý, sondai-aq gaz óńdeý zaýyttarynyń qurylysyn ýaqytynda aiaqtaý máselelerine basa nazar aýdarýdy mindettedi.
Aita keteiik, buǵan deiin Oljas Bektenov «Samuryq-Energo» kompaniiasynyń burynǵy basqarma tóraǵasy Qairat Maqsutovtyń qyzmetinen bosatylýyna túsinikteme bergen edi. Úkimet basshysy onyń jumystan ketýine jańa energetikalyq qýattardy salý jáne iske qosý merzimderiniń saqtalýyn baqylaýdyń jetkiliksizdigi sebep bolǵanyn aitqan. Maqsutov 28 qazanda qyzmetinen bosatyldy.
