Qazaqstan-Qytai shekarasyndaǵy «Dostyq» stantsiiasynda konteinerler júk ieleriniń kelisiminsiz tarifi qymbat terminaldarǵa baǵyttalyp jatýy múmkin, dep habarlaidy dalanews.kz.
Sonyń saldarynan kásipkerler aldyn ala kelispegen qosymsha shyǵyndardy tóleýge májbúr. «Aq jol» fraktsiiasynyń depýtattary Bas prokýratýra men Úkimetten bul jaǵdaidy tekserýdi talap etti.
Depýtat Asylhan Qojahmetovtiń aitýynsha, kásipkerler Qazaqstan-Qytai shekarasy arqyly júk tasymaldaý kezinde birneshe jyldan beri kedergilerge tap bolyp keledi. Fraktsiia bul máseleni 2021 jyly konteinerlerdiń jolda turyp qalýyna bailanysty, al 2025 jyly vagondardy jetkizýdegi qiyndyqtarǵa orai kótergen. Alaida depýtattardyń sózinshe, jaǵdai jaqsarýdyń ornyna kúrdelene túsken.
Kásipkerlerdiń málimetinshe, «Dostyq» stantsiiasynda júkterdi qaita tieýge arnalǵan tórt terminal bar: «KedenTransServis», «Evrotranzitterminal», «DostyqTransTerminal» jáne «Atasý». Júk ieleri aldyn ala belgili bir terminalmen kelisimshart jasap, qyzmet aqysyn tólegenine qaramastan, Qytaidan keletin konteinerler olardyń kelisiminsiz basqa terminalǵa, sonyń ishinde «DostyqTransTerminalǵa» baǵyttalýy múmkin.
Stantsiia basshylyǵy muny konteinerlerdi terminaldar arasynda teńdei bólý qajettigimen túsindiredi. Alaida depýtattar mundai sheshimniń naqty negizdemesi joq ekenin alǵa tartady.
«SevenR Logistics» JShS usynǵan derekterge sáikes, 2026 jylǵy qazanda «Dostyq» stantsiiasyndaǵy shamamen 3 720 konteinerdiń 978-i «KedenTransServiske», 1 069-y «Evrotranzitterminalǵa», 1 534-i «DostyqTransTerminalǵa», al 139-y «Atasý» terminalyna tiesili bolǵan.
Depýtattar ásirese konteinerlerdiń stantsiiadan 10 shaqyrym qashyqtyqta ornalasqan «DostyqTransTerminalǵa» kóptep baǵyttalýyna kúmán keltiredi.
Máseleniń taǵy bir qyry – qyzmet quny. Kásipkerlerdiń aitýynsha, balama terminaldarda bir konteinerdi qaita tieý tarifi 90 dollardan aspaidy. Al «DostyqTransTerminal» JShS bul qyzmet úshin 205–235 dollar alady. Osylaisha, júk iesiniń kelisiminsiz terminal aýystyrý kásipkerlerge edáýir qosymsha shyǵyn ákelýi múmkin.
«Aq jol» fraktsiiasy mundai tájiribe básekelestikke kedergi keltirip, jekelegen operatorlarǵa negizsiz artyqshylyq berýi yqtimal dep esepteidi. Depýtattar bul jaǵdai Qazaqstannyń kólik-logistikalyq áleýetin damytý jónindegi strategiialyq mindetterge de qaishy keletinin atap ótti.
Osyǵan bailanysty fraktsiia Bas prokýratýradan «Dostyq» stantsiiasy laýazymdy tulǵalarynyń konteinerlerdi júk iesiniń kelisiminsiz basqa terminalǵa baǵyttaý áreketteriniń zańdylyǵyn tekserýdi surady.
Sonymen qatar depýtattar konteinerlerdi terminaldar arasynda bólý tártibin naqty belgileýdi, tarifi joǵary terminaldardyń qosymsha shyǵyndaryn júk ielerine júkteýdiń zańdylyǵyn anyqtaýdy talap etti.
Budan bólek, Básekelestikti qorǵaý jáne damytý agenttigimen birlesip, terminaldarǵa konteiner bólýdegi ashyqtyqty qamtamasyz etý, yqtimal negizsiz básekelestik artyqshylyqtar men tarifterdiń negizdiligin tekserý usynyldy.
