Qazaqstan men Resei arasyndaǵy taýar ainalymy 27 mlrd dollardan asty, dep habarlaidy Dala News.
«Qazaqstannyń Syrtqy ister ministri Reseidiń elimizdiń negizgi saýda ekonomikalyq seriktesteriniń biri ekenin atap ótti. 2025 jyldyń qorytyndysy boiynsha taýar ainalymy 27 mlrd AQSh dollarynan asty, bul rette ózara saýdany odan ári ulǵaitý jáne kooperatsiiany keńeitý úshin aitarlyqtai áleýet saqtalyp otyr», - delingen SIM resmi málimetinde.
Kezdesý barysynda Qazaqstannyń syrtqy ister ministri Ermek Kósherbaev pen Resei syrtqy ister ministri Sergei Lavrov ekijaqty yntymaqtastyqtyń ózekti máselelerin talqylady. Sondai aq aldaǵy joǵary deńgeidegi saparlar kestesi qaralyp, ózara is qimyldy kúsheitýge daiyndyq barysy aityldy.
«Bizdiń elderimiz arasyndaǵy keshendi yntymaqtastyq jan jaqty strategiialyq áriptestik jáne odaqtastyq rýhynda dáiekti túrde damyp keledi», - dedi E. Kósherbaev.
Kelissózder barysynda Resei prezidenti Vladimir Pýtinniń Qazaqstanǵa josparlanǵan saparyna daiyndyq máseleleri qaraldy. Joǵary deńgeidegi turaqty bailanystar eki el arasyndaǵy qatynastardy damytýdaǵy negizgi faktor retinde baǵalandy.
Taraptar investitsiialyq yntymaqtastyqqa da nazar aýdardy. Sońǵy 20 jylda Reseidiń Qazaqstan ekonomikasyna salǵan investitsiiasy 29,3 mlrd dollardy, al Qazaqstannyń Reseige investitsiiasy 9 mlrd dollardy qurady. Reseilik kompaniialar ónerkásip, energetika jáne kólik salalaryndaǵy jobalarǵa qatysýda.
Sonymen qatar ónerkásiptik kooperatsiia, tsifrlyq tehnologiialar, jasandy intellekt jáne joǵary tehnologiialar baǵytyndaǵy ózara is qimyl máseleleri talqylandy.
Halyqaralyq kólik dálizderin damytý, shekara infraqurylymynyń ótkizý qabiletin arttyrý, sondai aq ekologiia, klimat jáne sý resýrstaryn paidalaný máseleleri de kún tártibine endi.
Budan bólek mádeni gýmanitarlyq bailanystar men bilim berý salasyndaǵy yntymaqtastyq qaraldy. Qazaqstan men Reseide birlesken bilim berý jobalary iske asyrylyp jatyr, stýdentter almasýy jalǵasýda.
Kezdesý qorytyndysy boiynsha eki eldiń syrtqy ister ministrlikteri arasyndaǵy 2027–2028 jyldarǵa arnalǵan yntymaqtastyq josparyna qol qoiyldy.
