Májilis depýtaty Rinat Zaitov Muhtar Shahanovqa kóshe ataýyn berý máselesine qatysty pikir bildirip, qoǵamda laiyq tulǵalar bar ekenin aitty, dep habarlaidy Dala News.
«Bizde tulǵalar joq emes, bar. Tiri kezinde de kósheniń atyn bergen adamdar bar. Sondyqtan bul jerde Muhtar Shahanov siiaqty qairatkerge qatysty kedergi kórip turǵan joqpyn», – dedi ol.
Depýtattyń aitýynsha, qoǵamǵa eńbegi sińgen tulǵalardy laiyqty deńgeide baǵalaý qajet.
«Muhtar Shahanov eldiń rýhaniiatyna úles qosqan tulǵa, sondyqtan oǵan kóshe ataýyn berý oryndy dep oilaimyn», – dedi Zaitov.
Al Májilis depýtaty Baqytjan Bazarbek bul máselege qatysty abai bolý kerektigin aitty. Onyń pikirinshe, qoǵamdyq pikir qalyptastyrýda jaýapkershilik mańyzdy.
«Ár adamnyń óz pikiri bar. Biraq qoǵamda arazdyq týdyratyn sózder men faktorlardy jariialaý máselesinde shekteý bolýy kerek», – dedi ol.
Onyń aitýynsha, ulttyq deńgeidegi tulǵalardy baǵalaý kezinde qoǵamdaǵy turaqtylyq pen birlik basty nazarda bolýy tiis.
Osylaisha, qoǵamda Muhtar Shahanovtyń esimin ulyqtaý máselesi tóńireginde túrli kózqaras qalyptasyp otyr. Bir tarap ony laiyq tulǵa dep sanasa, ekinshi tarap bul taqyrypta qoǵamdyq jaýapkershilik pen tepe teńdikti saqtaý qajettigin alǵa tartady.
