Soltústik Qazaqstan oblysynda Petropavl mańyndaǵy qorǵanys dambasynyń qurylysy tóńireginde daý shyqty, dep habarlaidy Dala News.
Pribrejnoe aýylynda damba salýǵa qatysqan jumysshylardyń aitýynsha, nysan tolyq aiaqtalǵanyna qaramastan, olarǵa shamamen 300 mln teńge tólenbegen. Al resmi derek boiynsha bul jobaǵa biýdjetten 3,5 mlrd teńge bólingen.
Qurylysshylardyń sózinshe, byltyr nysanǵa Aqmola, Túrkistan, Mańǵystaý jáne Almaty oblystarynan brigadalar kelgen. Bastapqyda eńbekaqy ýaqytyly tólengenimen, keiin tólemder toqtaǵan. Soǵan qaramastan jumysshylar dambany belgilengen merzimde, sý tasqynyna deiin aiaqtap shyqqan.
Qazirgi tańda olardyń kóbi qiyn jaǵdaida qalǵan. Biri eńbekaqysyn almai elge qaitsa, endi biri jaldamaly páterde turyp, qaryzǵa kirip, nesiesin tólei almai otyr. Keibir jumysshylarǵa birneshe million teńge qaryz ekeni aitylýda.
Al Qyzyljar aýdandyq ákimdigi barlyq qarajat bas merdigerge tolyq tólengenin málimdedi. Olardyń aitýynsha, másele endi bas merdiger men qosalqy merdigerler arasyndaǵy esep aiyrysýmen bailanysty. Ákimdik ókilderi kezdesý barysynda bas merdiger qaryzdy 2–3 kún ishinde jabýǵa ýáde bergenin jetkizdi.
Alaida bas merdiger bul jaǵdaiǵa qatysty túsinikteme berýden bas tartqan. Jumysshylar bolsa ýádeden sharshaǵanyn aityp, jaqyn kúnderi aqsha tólenbese, prokýratýra men eńbek inspektsiiasyna júginetinin málimdedi.
Osylaisha, sý tasqynynan qorǵaý úshin milliardtaǵan qarjy bólingen nysan endi ony salǵan adamdarǵa eńbekaqy tólenbegeni úshin qoǵamda úlken rezonans týdyryp otyr.
