Qyzylordada jol apatynan bes ailyq sábiinen aiyrylyp, ózi aýyr jaraqat alǵan áieldiń esin jiǵany belgili boldy. Al ana men balany qaǵyp, oqiǵa ornynan qashyp ketken júrgizýshi áli izdestirilip jatyr.
Qaiǵyly oqiǵa 13 qazanda Qyzylorda qalasyndaǵy Qultekenov kóshesinde bolǵan. Saǵat 17:10 shamasynda Mitsubishi Lancer avtokóliginiń júrgizýshisi qolynda bes ailyq sábii bar áieldi qaǵyp ketken.
Jol apatynan keiin júrgizýshi zardap shekkenderge kómek kórsetpesten oqiǵa ornynan ketip qalǵan.
Aýyr jaraqat alǵan ana men bala shuǵyl túrde aýrýhanaǵa jetkizilgen. Alaida dárigerler náresteniń ómirin saqtap qala almady.
Aýyr jaraqat alǵan anasy esin jidy
Jol apatynan keiin áiel birneshe kún boiy es-tússiz jatqan. Dárigerler onyń jaǵdaiyn óte aýyr dep baǵalaǵan.
Meditsinalyq málimetterge súiensek, áieldiń bas súiegi, qabyrǵalary, buǵanasy, jambasy men tobyǵy synǵan. Sondai-aq ókpesi zaqymdanyp, aýyr jaraqattyq shok alǵan.
Keiinirek zardap shekken áieldiń esin jiǵany belgili boldy.
31 qazanda jariialanǵan materialdyń taqyrybynda onyń telefony qolynda ekeni, aqparattardy kórip, oqyp otyrǵany aitylǵan. Alaida áieldiń qazirgi densaýlyq jaǵdaiyna qatysty tolyq meditsinalyq qorytyndy jariialanbaǵan.
Onyń sábiiniń qazasy týraly habardar ekeni de naqty rastalmady.
Júrgizýshi eki aptadan astam ýaqyt boiy izdestirilip jatyr
Qyzylorda oblystyq politsiia departamenti adam ólimine ákelgen jol-kólik oqiǵasy jáne oqiǵa ornynan ketip qalý derekteri boiynsha qylmystyq ister qozǵaǵan.
Tergeý barysynda kólikti basqarǵan adamnyń jeke basy anyqtalǵan.
Alaida 31 qazanda jariialanǵan málimetke sáikes, kúdikti áli ustalǵan joq.
Quqyq qorǵaý organdary oǵan resmi túrde izdeý jariialaǵan. Sonymen qatar sot sanktsiiasymen syrttai qamaýǵa alý bultartpaý sharasy qabyldanǵan.
Politsiia kúdiktiniń júrgen jerin anyqtaýǵa qajetti sharalar júrgizilip jatqanyn jáne tergeý erekshe baqylaýda ekenin habarlaǵan.
Qaiǵyly oqiǵanyń barlyq mán-jaiy tergeý barysynda anyqtalady.
