Almaty oblysynda Sorbulaq sý qoimasy mańynan bólshekteri tabylǵan EC-145 áskeri tikushaǵyna qatysty izdestirý-qutqarý jumystary besinshi kún qatarynan jalǵasyp jatyr. Úsh ekipaj múshesi bar tikushaqtyń naqty qaida qulaǵany ázirge belgisiz. Izdeýge sý túbin zertteitin drondar da tartylǵanymen, laily kóldiń ereksheligi izdeýdi qiyndatyp otyr, dep habarlaidy Dalanews.kz.
Jýrnalist Gúlmira Ábiqai joǵalǵan tikushaqta bolǵan ushqyshtyń jubaiy aitqan jan tebirenter sózderdi jariia etti. Jas kelinshektiń aitýynsha, olar nekege turǵandaryna nebári segiz ai bolǵan.
"Tabylmaǵan tikushaqta jan jarym qaldy. Shańyraq kótergenimizge – 8 ai. Vertoletta eki pilot beldigin bailap otyrady, shyǵa almai qalǵan ǵoi. Áitpese, sekirip aman qalar ma edi…", – deidi ol kózine jas alyp.
29 jastaǵy ushqysh Aman Amangeldi – Aqtóbedegi ushqyshtar institýtynyń túlegi. Artynda alty jyldyq tájiribesi bar. Ol ótken jyldyń sońynda mýzykant Nurai esimdi boijetkenmen shańyraq kótergen. Jas otbasynyń úilengenine bir jyl da bolmaǵan.
Oqiǵanyń bes kúnnen beri naqty aqparaty shyqpaǵandyqtan, áleýmettik jelilerde túrli boljamdar men qaýesetter taraýda. Otar mańynda radardan joǵalǵan tikushaqtyń bólshekteri 200 shaqyrym jerden tabylǵany da kúmándi pikirlerdi údete tústi.
Sorbulaq – túbi batpaq, tereńdigi 22 metrge deiin jetetin, laily sý qoimasy. Mamandardyń aitýynsha, Almaty qalasynyń káriz sýlary osy mańǵa quiatyny da izdestirý jumysyna kedergi keltirip otyr.
"Bir kóripkel maǵan jeke jazyp, “tikushaqtaǵy adamdar altynshy kúni tabylady” depti. Erteń…", – dep jazdy jýrnalist.
Izdestirý-qutqarý jumystaryna jeke quramnan 200-ge jýyq adam, 40 birlik tehnika, 15 sý kóligi, 4 kinologiialyq eseptop jáne 2 TJM áýe kemesi tartylǵan.
