الماتى وبلىسىندا سوربۇلاق سۋ قويماسى ماڭىنان بولشەكتەرى تابىلعان EC-145 اسكەري تىكۇشاعىنا قاتىستى ىزدەستىرۋ-قۇتقارۋ جۇمىستارى بەسىنشى كۇن قاتارىنان جالعاسىپ جاتىر. ءۇش ەكيپاج مۇشەسى بار تىكۇشاقتىڭ ناقتى قايدا قۇلاعانى ازىرگە بەلگىسىز. ىزدەۋگە سۋ ءتۇبىن زەرتتەيتىن دروندار دا تارتىلعانىمەن، لايلى كولدىڭ ەرەكشەلىگى ىزدەۋدى قيىنداتىپ وتىر، دەپ حابارلايدى Dalanews.kz.
جۋرناليست گۇلميرا ءابىقاي جوعالعان تىكۇشاقتا بولعان ۇشقىشتىڭ جۇبايى ايتقان جان تەبىرەنتەر سوزدەردى جاريا ەتتى. جاس كەلىنشەكتىڭ ايتۋىنشا، ولار نەكەگە تۇرعاندارىنا نەبارى سەگىز اي بولعان.
"تابىلماعان تىكۇشاقتا جان جارىم قالدى. شاڭىراق كوتەرگەنىمىزگە – 8 اي. ۆەرتولەتتا ەكى پيلوت بەلدىگىن بايلاپ وتىرادى، شىعا الماي قالعان عوي. ايتپەسە، سەكىرىپ امان قالار ما ەدى…"، – دەيدى ول كوزىنە جاس الىپ.
29 جاستاعى ۇشقىش امان امانگەلدى – اقتوبەدەگى ۇشقىشتار ينستيتۋتىنىڭ تۇلەگى. ارتىندا التى جىلدىق تاجىريبەسى بار. ول وتكەن جىلدىڭ سوڭىندا مۋزىكانت نۇراي ەسىمدى بويجەتكەنمەن شاڭىراق كوتەرگەن. جاس وتباسىنىڭ ۇيلەنگەنىنە ءبىر جىل دا بولماعان.
وقيعانىڭ بەس كۇننەن بەرى ناقتى اقپاراتى شىقپاعاندىقتان، الەۋمەتتىك جەلىلەردە ءتۇرلى بولجامدار مەن قاۋەسەتتەر تاراۋدا. وتار ماڭىندا راداردان جوعالعان تىكۇشاقتىڭ بولشەكتەرى 200 شاقىرىم جەردەن تابىلعانى دا كۇماندى پىكىرلەردى ۇدەتە ءتۇستى.
سوربۇلاق – ءتۇبى باتپاق، تەرەڭدىگى 22 مەترگە دەيىن جەتەتىن، لايلى سۋ قويماسى. مامانداردىڭ ايتۋىنشا، الماتى قالاسىنىڭ كارىز سۋلارى وسى ماڭعا قۇياتىنى دا ىزدەستىرۋ جۇمىسىنا كەدەرگى كەلتىرىپ وتىر.
"ءبىر كورىپكەل ماعان جەكە جازىپ، “تىكۇشاقتاعى ادامدار التىنشى كۇنى تابىلادى” دەپتى. ەرتەڭ…"، – دەپ جازدى جۋرناليست.
ىزدەستىرۋ-قۇتقارۋ جۇمىستارىنا جەكە قۇرامنان 200-گە جۋىق ادام، 40 بىرلىك تەحنيكا، 15 سۋ كولىگى، 4 كينولوگيالىق ەسەپتوپ جانە 2 تجم اۋە كەمەسى تارتىلعان.
