Ǵylym jáne joǵary bilim ministri Saiasat Nurbek 23 jasqa deiingi balýandar arasyndaǵy álem chempionatynda altyn medal ielengen Aibek Aitbekov pen Iýsýf Ashrapovty jeńisimen quttyqtady.
Ministr áleýmettik jelidegi paraqshasynda qos sportshynyń jetistigin Qazaqstan jastary úshin úlken úlgi dep baǵalady.
AQSh-tyń Las-Vegas qalasynda ótip jatqan álem chempionatynda Aibek Aitbekov pen Iýsýf Ashrapov grek-rim kúresinen altyn medal jeńip aldy.
Saiasat Nurbek Aibek Aitbekovtiń Ál-Farabi atyndaǵy Qazaq ulttyq ýniversitetinde, al Iýsýf Ashrapovtyń M.H.Dýlati atyndaǵy Taraz ýniversitetinde bilim alyp júrgenin atap ótti.
"AQSh tórinde kók týymyz jelbiredi! Bir álemdik dodada eki birdei balýanymyz jeńis tuǵyrynyń eń biik satysyna kóterildi. Iýsýf Ashrapov pen Aibek Aitbekov 23 jasqa deiingi balýandar arasyndaǵy álem chempionatynda altyn medal jeńip alyp, Qazaqstannyń mereiin asyrdy!
Aibek Aitbekov Ál-Farabi atyndaǵy Qazaq ulttyq ýniversitetinde bilim alsa, Iýsýf Ashrapov M. H. Dýlati atyndaǵy Taraz ýniversitetiniń stýdenti. Qos chempion el namysyn abyroimen qorǵady.
Maǵjan Jumabaevtyń «Arystandai aibatty, Jolbarystai qairatty» degen jyr joldary osyndai jastarǵa arnalǵandai. Aqynnyń «Men jastarǵa senemin!» degen sózi Iýsýf pen Aibek sekildi órenderdiń jeńisimen úndesip tur.
Jeńis tuǵyryndaǵy chempionǵa qarap, sportqa qadam basatyn stýdentter kóbeisin. Qazaqstandyq jastardyń esimi ǵylymda da, bilimde de, sportta da tanyla bersin!
Iýsýf Ashrapov pen Aibek Aitbekovti, olardyń jattyqtyrýshylaryn jáne jaqyndaryn álem chempionatyndaǵy jeńisterimen shyn júrekten quttyqtaimyn!
Altyn medaldaryń qutty bolsyn, jigitter! Kók týymyzdy áli talai álemdik dodada jelbirete berińder", – dep jazdy ministr.
Aibek Aitbekov 60 kelige deiingi salmaqta top jarsa, Iýsýf Ashrapov 72 kelide chempion atandy.
