Prezident Soltústik Qazaqstan oblysynyń ákimi Ǵaýez Nurmuhambetovty qabyldady,- dep habarlaidy Dalanews.kz
Qasym-Jomart Toqaevqa aimaqtyń biylǵy birinshi jartyjyldyqtaǵy áleýmettik-ekonomikalyq damýy jóninde esep berildi.
Memleket basshysyna maily jáne jem-shóp daqyldarynyń egistik kólemi ulǵaiǵany týraly baiandaldy. Ákimniń aitýynsha, tuqym jańartý deńgeii 11,2 paiyzǵa jetken, sý únemdeý tehnologiialary belsendi engizilip jatyr. "Keń Dala 2" baǵdarlamasy aiasynda sharýalarǵa 97 milliard teńge bólingen. Biyl memlekettik qoldaý aýqymy byltyrǵymen salystyrǵanda 24 paiyzǵa artqan.
Prezidentke Soltústik Qazaqstan oblysy elimizde sút óndirisi boiynsha alǵashqy úshtikke kiretini, sonyń ishinde sút óndirý keshenderiniń sany jaǵynan kósh bastap turǵany aityldy.
Ǵaýez Nurmuhambetov oblysta jalpy somasy 893 milliard teńge bolatyn 52 investitsiialyq joba júzege asyrylyp jatqanyn jetkizdi. Nátijesinde 7,5 myń jańa jumys orny ashylmaq.
"Biyl 332 myń sharshy metr turǵyn úidi paidalanýǵa berý josparlanǵan. Qazir 5 kópqabatty úi tapsyryldy. Jyl sońyna deiin taǵy da 11 nysannyń qurylysy aiaqtalady. Áleýmettik osal topqa jatatyn azamattar úshin biyl 258 páter satyp alynady", - dedi óńir ákimi.
"Keleshek mektepteri" ulttyq jobasy aiasynda Petropavl qalasynda 600 oryndyq jańa zamanaýi mektep salyndy. Sonymen qatar, 280 oryndyq balabaqshanyń qurylysy júrgizilip jatyr. Densaýlyq saqtaý salasynda aýyldyq jerdegi 46 meditsinalyq nysan jańǵyrtyldy. Óńirge meditsina mamandaryn tartý maqsatynda júieli jumys atqarylyp jatyr.
Prezident jiyn-terin naýqanyna daiyndyqtyń, agroónerkásip salasyndaǵy investitsiialyq jobalardy ýaqtyly júzege asyrýdyń mańyzyna nazar aýdardy. Sondai-aq, Petropavldaǵy 2-JES-ti jóndeý jáne jylýmen, energiiamen qamtamasyz etý jelilerin rekonstrýktsiialaý jumystaryn jyldam aiaqtaý qajet ekenin eskertti.
