Úkimet úiinde ótken baspasóz máslihatynda premer-ministrdiń orynbasary Roman Skliar eldegi áleýmettik teńsizdik, oligopoliia máselesi jáne azamattardyń tabys deńgeiine qatysty pikir bildirdi, dep habarlaidy Dalanews.kz.
Jiynda jýrnalisterdiń biri Qazaqstanda kedei azamattardyń sany azaimai otyrǵanyn, al Forbes tizimindegi adamdar baiyǵan ústine baiyp jatqanyn aityp, "Oligopoliiamen kúresemiz dep edińizder, biraq is júzinde olar baiyp jatyr ǵoi?" dep saýal qoidy.
Roman Skliar bul pikirmen kelispeitinin jetkizdi:
"Biz qazir Jańa Qazaqstanda ómir súrip jatyrmyz. 2022 jyly óte kúrdeli synaqtardan óttik, sodan beri jańa baǵytqa kóshtik dep jariialadyq. Búgingi kúnde Qazaqstanda oligopoliia joq dep naqty aita alamyn. Sizder aitqan adamdar da, kompaniialar da memlekettik saiasatqa nemese parlament pen memlekettik organdardyń sheshimderine yqpal ete almaidy. Oligopoliialyq qurylymdar bizdiń elde joq".
Onyń aitýynsha, elde demonopolizatsiia boiynsha úlken jumystar atqarylǵan. Premer-ministrdiń tóraǵalyǵymen arnaiy komissiia qurylyp, elden zańsyz shyǵarylǵan kapitaldy qaitarý jumystary da jalǵasyp jatyr.
"Burynnan biznespen ainalysyp júrgen kásipkerler óz qyzmetterin ary qarai jalǵastyrýǵa quqyly. Olar el ekonomikasyna investitsiia salýǵa, jańa jumys oryndaryn qurýǵa jáne óz aktivterin jaqsartýǵa mindetti. Bul – olardyń tikelei mindeti. Memleket olarǵa eshqandai kedergi keltirmeidi", – dedi Skliar.
Sondai-aq, ol Qazaqstanda jumys istegisi keletin azamattarǵa jaǵdai jasalǵanyn erekshe atap ótti.
"Kedeiler sany artyp, bailar baiyp bara jatyr" degen pikirge qatysty aitarym, bizde ónerkásip pen qyzmet kórsetý salasynda kóptegen bos jumys oryndary bar. Múmkin keibir azamattar jýrnalist nemese bloger bolǵysy keletin shyǵar, biraq jastarǵa suranys joǵary. Olar basqa salaǵa mamandanyp, jańa kásipti igerse, jaqsy tabys taba alady. Bul úshin eńbektený kerek", – dep tolyqtyrdy vitse-premer.
Jýrnalist "millionǵa jýyq adamnyń kedeilik sheginde ómir súrýi ádiletti me" dep suraǵanda, Skliar bylai dep jaýap berdi:
"Áleýmettik turǵydan osal azamattar, jumysqa qabiletsiz jandar, qiyn jaǵdaiǵa tap bolǵandar men múgedektigi bar azamattarǵa memleket tiisti deńgeide kómek kórsetip jatyr. Taǵy da qaitalap aitamyn, ásirese jastar úshin eńbek etip, jaqsy tabys tabýǵa elimizde barlyq jaǵdai jasalǵan. Ol úshin eńbekqorlyq pen jańa mamandyq meńgerýge daiyn bolý qajet. Otbasyn asyrap, jaqsy tabys tabýǵa tolyq múmkindik bar. Oǵan qosa, Qazaqstanda biýdjettiń 50%-dan astamy áleýmettik maqsattarǵa jumsalady. Damyǵan elderdiń ózinde mundai kórsetkish sirek kezdesedi", – dep sózin túiindedi Roman Skliar.
Aita ketsek, 2022 jyly Prezident Qasym-Jomart Toqaev eldegi oligopoliialyq qurylymdardyń áleýmettik teńsizdik pen ekonomikalyq problemalardyń basty sebebi ekenin atap ótken bolatyn. Memleket basshysy sol kezde: "Bailar baiydy, kedeiler odan saiyn kedeilenip, memleketke degen senimin joǵaltty", – degen edi.
