Sońǵy jyldary Qazaqstanǵa halyqaralyq investorlardyń qyzyǵýshylyǵy aitarlyqtai artyp, el Ortalyq Aziiadaǵy sheteldik kapitaldyń negizgi bóligin ózine tartyp otyr, dep habarlaidy dalanews.kz.
BUU-nyń Saýda jáne damý jónindegi konferentsiiasynyń (UNCTAD) 2025 jylǵy World Investment Report baiandamasyna sáikes, táýelsizdik jyldarynan beri Qazaqstanǵa tartylǵan tikelei sheteldik investitsiia kólemi $151 mlrd-tan asty. Bul Ortalyq Aziia elderine kelgen investitsiialardyń shamamen 70%-yna teń.
Álemde geosaiasi turaqsyzdyq pen kapital úshin báseke kúsheigenine qaramastan, Qazaqstan óńirdegi investitsiialyq tartymdylyǵyn saqtap qaldy. Sarapshylar muny eldiń strategiialyq ornalasýy, tabiǵi resýrstary, tranzittik áleýeti jáne institýtsionaldyq reformalarmen bailanystyrady.
Halyqaralyq investorlardyń qyzyǵýshylyǵy artty
Sońǵy jyldary Qazaqstanǵa Eýropa, AQSh, Qytai, Parsy shyǵanaǵy elderi men Taiaý Shyǵystyń iri kompaniialary belsendi investitsiia salýda. Investitsiialar negizinen energetika, kólik-logistika, tsifrlandyrý, óńdeý ónerkásibi jáne jańartylatyn energiia kózderine baǵyttalǵan.
Máselen, 2026 jyly frantsýzdyq TotalEnergies kompaniiasy Qazaqstandaǵy qýaty 1 gigavatt bolatyn «Mirnyi» jel elektr stantsiiasyna $1,2 mlrd investitsiia salý týraly sheshim qabyldady. Jobaǵa BAÁ-diń Masdar kompaniiasy da qatysýda.
Katar kapitaly iri oiynshylardyń izimen kelýde
Sarapshylardyń pikirinshe, Qatardyń Qazaqstan ekonomikasyna qyzyǵýshylyǵy kezdeisoq emes. Buǵan deiin elimizge amerikalyq, eýropalyq, qytailyq jáne arab investorlary kelse, qazir Parsy shyǵanaǵyndaǵy qarjy institýttary da Qazaqstandy uzaq merzimdi seriktes retinde qarastyra bastady.
Qatarlyq kapitaldyń kelýi Qazaqstannyń halyqaralyq naryqtaǵy senimdi investitsiialyq baǵyt retindegi bedeliniń nyǵaiǵanyn kórsetedi. Ásirese energetika, kólik infraqurylymy jáne agroónerkásip salalary jańa seriktestik úshin perspektivaly baǵyt retinde qarastyrylýda.
Jańa investitsiialyq imidj qalyptasyp jatyr
Ekonomisterdiń aitýynsha, Qazaqstannyń halyqaralyq arenadaǵy beinesi birtindep ózgerip keledi. Eger buryn el negizinen munai men metalǵa táýeldi shikizattyq ekonomika retinde qabyldansa, qazir Qazaqstan kólik-logistikalyq hab, tsifrlyq jobalar men jasyl energetikaǵa investitsiia tartatyn memleket retinde tanyla bastady.
UNCTAD málimetteri boiynsha, álemdik tikelei sheteldik investitsiialar kólemi tómendep jatqan jaǵdaida da Qazaqstan halyqaralyq kapital úshin mańyzdy baǵyt mártebesin saqtap otyr.
Sarapshylardyń baǵalaýynsha, iri halyqaralyq investorlardyń kelýi men jańa qarjy aǵyndary Qazaqstannyń investitsiialyq imidjin kúsheitip, eldiń óńirlik ekonomikalyq ortalyq retindegi pozitsiiasyn nyǵaitýǵa yqpal etýde.
